• 吾港戲|外貌早改變 處境都變(尹學仁)
  • 2020-11-11    

  • 吾港戲|外貌早改變 處境都變(尹學仁)

 


外貌早改變 處境都變

不過楊凡從來未變。

終於決定去睇同講《繼園臺七號》,因為對香港歷史有情意結。今時今日香港人,對香港歷史開始注重視,你可以話本土意識抬頭,因為好簡單,80 年代,利舞台劇院清拆,重建成零特色玻璃幕牆商場大廈,有市民團結反對?可能有,可能非常零星,如果換轉今時今日,你可以想像民間會有幾大反應。不過最諷刺,正正因為香港人已經比 30 幾年前進步好多,所以《繼園臺七號》注定出事。

容許我做文抄公,上年《繼園臺七號》威尼斯電影節世界首映,有關反送中運動,楊凡導演對外國人,講過以下說話:

「我受的是英國教育,不懂何謂人權、民主,但是 52 年後,有一股不知從何而來的詭異力量,來自我們所不清楚的源頭,以自由與人權、民主之名,把香港弄得天翻地覆,現在我們甚至無法自由乘搭大眾交通工具,好多邪惡的人從盒子內走出來互鬥。但我覺得潘朵拉盒子總會有希望,我希望香港可以回復正常。」

好多人認定楊凡導演深藍,我覺得楊凡連黃藍都未必識得分。楊凡電影,從來都只有以下兩點:唯美(不過人人對美有不同標準)以及性幻想。楊凡導演根本從來都未擔心過生活,不知民間疾苦,拍電影從來以個人出發,純粹為自己,30 幾年來從未變過,今次點會例外?


一度以為《繼園臺七號》會有多少人民社會情懷,我顯然太過一廂情願,被預告片一堆舊香港畫面誤導,故事即使設定於六七暴動前後,到底其實不過熟女人妻對小鮮肉性幻想,甚至同自己個中學獨生女爭仔,最後未有去盡整場母女3P,我覺得導演已經留一手。

電影前半段有大量 VO,導演親口錄音,當然想營造一種文學感覺,不過實在太多,而且 VO 所講,根本同畫面主角動作一樣,觀眾有眼睇,導演你仲用口講一次?當然,有人指出導演其實師承法國新浪潮風格云云,正如第一場無波網球賽,其實向意大利導演安東尼奧尼致敬,難怪上年捧得走威尼斯影展最佳劇本。


作為動畫去睇,《繼園臺七號》集合多種不同畫風,其實 matched 得幾好,而所有主角甚至貓都由頭到尾慢動作(不過講對白就正常 speed),可能風格(舊香港慢節奏),亦可能慳錢。當然要讚,音樂亦值得一讚。講到唯美,不止三分釘。

當然如果要認真,繼園臺設定其實同現實有幾大落差,有北角街坊入場睇完表示失望。事實上男主女角重要時刻一吻定情,竟然戲院之內挨住條柱?皇都戲院之所以今日得到保育,因為屋頂用拱橋設計,點解戲院用拱橋設計?因為想戲院裡面零柱位,觀眾毋須向隅(隅等於柱,所以以前會講,欲免向隅,購票從速),所以導演你要畫皇都,戲院裡面點可以有柱?另外結局高潮前一場,阿女同小鮮肉中環日落談情,和平紀念碑之下,個太陽竟然降落獅子山?日落北山?地理方向錯到七彩。


然後阿女除假髮,長髮飄飄同英國以至港英旗同方向吹起,其實究竟點解?其實《繼園臺七號》仲有好多點解,不過莫非你第一次睇楊凡電影?楊凡從來為自己而拍,口味從來個人小眾,導演正正 80 年代出道,當年香港盛世,紙醉金迷,所以能夠接納。反觀今日香港正正直插谷底,社會兩極化,楊凡不食人間煙火,自然不合時宜。

結局之後,片尾之前,《繼園臺七號》最驚心動魄畫面出現,楊凡打出四隻大字「獻給香港」,然後片尾絕大部份工作人員,全部來自台灣或者大陸。其實,香港有大量動畫人材,當中不少世界級,平日接外國廣告 MV 工作維生,楊凡偏偏匿埋外地閉門造車,仲話「獻給香港」,實在難聽過粗口。

被時代淘汰,《繼園臺七號》會成為楊凡導演最後一部電影長片?

作者簡介

行內人會視為行外人,行外人又會視為行內人。做過電影主創,又做過電影媒體,仲做埋電影教育。未天真到相信電影永恆,亦未灰心到認為香港電影玩完。不過一句到尾,身為電影觀眾,曾經叫做電影學生同畢業生,與其要做電影人,倒不如先透過電影學做人,首先要做個好人。

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所