• 錯上加錯|Son姐張慧敏專欄
  • 2020-11-09    

  • 錯上加錯|Son姐張慧敏專欄

 

承接上一篇(僱傭合約須知|Son姐張慧敏專欄 ),我的讀者因為冇睇清楚僱傭合約內的辭職條款,一心以為賠錢就走得,但合約條款寫明通知期不能以現金賠償,一定要做足三個月先可以離職。結果件事點收科?

我夠膽講,結局冇人估得到!因為讀者很渴望得到這份新的工作機會,錯上加錯,鑄成大錯!

我幾時都話,唔理出咗咩事,Honesty is the best policy! 讀者如果直接同新工作主管坦白,話自己疏忽冇睇清楚合約辭職條款,原來賠錢都唔走得,一定要做足三個月。如果對方真的認為,讀者是最適合人選,未必不肯等,又即使沒法等,最低限度讀者都可以保住目前的工作。可是,讀者沒有選擇坦白從寬,而走旁門左道,真的很可惜!

讀者因為工作壓力大,經常失眠,一直有睇精神科,亦被評估有抑鬱傾向。所以就用這個理由,誇大病情,向公司請病假,提早返新工。以為可以瞞天過海?若要人不知,真係唔好咁低B!呢頭返工,轉頭就已經通天!

病假期間,雖然不用上班,實際上仍然是公司的僱員。而且因為讀者在舊公司有累積下來的有薪病假,所以病假期間公司依然正常出糧,所以管理層知道之後非常憤怒。人事部主管直接去信新公司人事部,查詢這位仍然是自己公司的僱員,是否在他們公司任職並正在上班。當被新老闆及人事部主管召見時,讀者還不知道自己大禍臨頭。

證據確鑿、事實擺在眼前,讀者只好和盤托出,一切都是因為自己太喜愛這份工作,所以出此下策。但對新公司而言,這絕對不是一件小事,是關乎誠信的問題。而且亦很難相信,讀者這樣做並非為了攞盡舊公司着數,連有薪病假都要攞足先走。雖然舊公司未必會採取法律行動,但亦不能掉以輕心。決定馬上要讀者離職,再補上一封律師信,保留一切追討損失的權利。

我之所以知得如此詳細,是因為讀者來信問我可否吃回頭草,據他所知,他離職後職位一直懸空。他認為自己是最佳人選,回去後可以無縫接軌。這種自以為是的想法,究竟是天真還是低能?不過我是不得不佩服他的自信!

所以結局就是,新工作保不住,舊公司回不了去不特只,更被 Blacklist 了,重新開始再搵工!



作者簡介:

張慧敏 (Alison),人稱 Son姐,從「獵頭女王」成功轉型成為商企顧問公司CEO,由始至終的專業是憑一對慧眼看盡職場大小疑難雜症。正職是一對兒女的母親,從自身挫折和經驗悟出教養之道,不外乎以身作則。

個人Facebook 專頁

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所