• 專訪前國泰空姐續論星客|「踢波阿伯」好兄弟填病歷表擺款 評「潮流西客」: 佢用粗口招呼你已算畀面
  • 2020-11-07    

  • 專訪前國泰空姐續論星客|「踢波阿伯」好兄弟填病歷表擺款 評「潮流西客」: 佢用粗口招呼你已算畀面

 

一場「疫」轉

國泰早前進行歷來最大規模的裁員,震撼全港,又一個變了質的香港品牌,留下簽新約的「倖存」者,或一班離場的「棄將」,是禍是福,視乎你如何看待自己的人生旅程。

如早前一位國泰空姐,呢頭失業,轉頭在另一天空極速成名!她就是八年前已開設頻道「Smart Travel」的YouTuber阿Tsar(人稱她阿Sa),早前由直播國泰大地震,到暢談多年來在航空界的秘聞,其中名人明星在雲霄上的真我本性,非一般普羅大眾為人知的見聞,就因她句句到肉,用詞精僻分享後,一夜間粉絲如衝上雲霄,激增數千,現有6萬訂閱戶。

她說當日收到國泰「無情雞」後,有解脫快感,離開工作超過廿年的公司,亦毫不依戀。「十月前,我嘅YouTuber頻道開始多少少人鍾意睇,我心諗你裁走我唔緊要,但至少要快啲畀我知道,正當想叠埋心水全職做YouTuber,而家畀咗個答案我,我嘅目標更加明確,即係頭也不回,所以會覺得任何事情總有上天安排,只能夠喺當下將任何眼前事情做好,但過去嘅就要let go。」一場「疫」轉,阿Tsar由機艙經理,變成爆紅YouTuber。

「潮流西客」一發老脾掟嘢

有廿年以上資歷,個人閱歷亦極其豐富,由雲霄中光怪陸離見聞,到生活品味、精於堪虞命理,天南地北統統耍家。既然外界對十大優劣星客反應熱烈,阿Tsar亦樂於繼續分享星客秘聞。

分享他們軼事的目的,並非純粹滿足八卦,而是警世。「想透過呢啲喺好多人心目中嘅偶像,佢哋嘅行為舉止,在普羅大眾係一個學習對象。」對住空姐,坐頭等買服務的藝人如照妖鏡,一言一行表露無遺。

被她列入十大最討厭星客當中,名列榜首的「潮流西客」,阿Tsar說他在航空界,用四個字形容:「聞風喪膽!即係佢只用粗口招呼你,已經算係畀面。」

這位愛追潮流,近年育有一女的「西客」脾氣暴躁,惡行中除指著為他處理事件的機長說:「You are just my driver!」,亦試過向空姐掟嘢。「佢向空姐掟嘢,唔使一杯飲料,只係一啲輕物,例如登機證或入境紙。」至於甚麼事令他動怒,阿Tsar續說:「雞毛蒜皮到佢哋都講唔出原因,可能遲咗回應都會受到粗暴對待。」
 出名臭脾氣的「潮流西客」,阿Tsar話是空姐心目中屬聞風喪膽的客人。
出名臭脾氣的「潮流西客」,阿Tsar話是空姐心目中屬聞風喪膽的客人。
 阿Tsar指「潮流西客」每次上機都搵空姐出氣,輕則粗口招呼,重則掟嘢。現為人父,唔知臭脾氣有冇改善?
阿Tsar指「潮流西客」每次上機都搵空姐出氣,輕則粗口招呼,重則掟嘢。現為人父,唔知臭脾氣有冇改善?

「踢波阿伯」親民面孔的背後


至於她的親身經歷,是排行第五位的討厭星客「踢波阿伯」,當日她在機艙經過,被對方喝停:「攞杯水畀我!」,她被「踢波阿伯」的無禮,窒了一下:「梗係愕然啦,覺得佢使唔使咁樣呀?好似吩咐隻狗咁樣。」

「踢波阿伯」向來在鏡頭及觀眾前是行親民,故此無禮一喝,跟平日形象落差極大。

不過國泰空姐出名嚴格訓練,服務水平屬國際級,加上阿Tsar天生EQ高,故此被客人呼喝,她的應對:「我窒咗一下之後,就若無其事咁攞杯水俾佢,因為返工唔可以對事情太介懷。有少少唔舒服之後,好快幾秒鐘已經覺得只係客人一個,唔可以覺得所有人都好有教養。」幸好「踢波阿伯」非她偶像,不致令她失望!「我覺得佢唱歌好聽,不過佢唔係我偶像,因為對我嚟講,有少少uncle感覺。」
 「踢波阿伯」鏡頭前行親民,但阿Tsar就親身體驗對方的無禮。
「踢波阿伯」鏡頭前行親民,但阿Tsar就親身體驗對方的無禮。

「踢波阿伯」好兄弟亦屬「極品」

「踢波阿伯」同聲同氣好兄弟,亦屬極品,阿Tsar以生動鬼馬的YouTuber腔,分享以下一則。

「做娛樂圈好少人可以紅足幾十年,你紅唔紅,分分鐘普羅大眾俾你自己更清楚。有一位藝人,曾經喺東南亞紅極一時,我講嘅係曾經,由吉隆坡飛去檳城。咁啱嗰班機有一位好年輕嘅舊同事空姐喺班機上,藝人唔知係咪唔夠瞓頭痛,就向呢位年輕空姐攞兩粒止痛丸。當時呢間航空公司有個規矩,但凡飛機上面有客人唔舒服,要問空姐攞藥食,空姐係需要要求病人填寫一份病歷表,作為公司記錄。當呢位年輕空姐攞頭痛藥丸畀呢位藝人,及請佢填上一份病歷表,藝人即刻上身,挺直條腰除下黑超,喺病歷表上填咗個明星簽名。我呢位年輕空姐朋友,少不更事,唔知呢位uncle喺病歷表上寫咗啲咩嘢,入到廚房向一位年資比較深嘅空姐,講番呢件事。資深空姐一睇呢個簽名,即刻笑咗出嚟,話得喇得喇,我幫佢填啦!年輕空姐仲未知死,追問呢位阿姐,嗰位uncle係邊個?阿姐就話,嗰個客人嘅名,唔係叫做Kenny G,嘥鬼氣啦,食塊卡樂B啦!」
 「踢波阿伯」的同聲同氣好兄弟,跟他同樣屬「極品」。
「踢波阿伯」的同聲同氣好兄弟,跟他同樣屬「極品」。

發哥與杯麵

她提過的十大好星客,港人心中「特首」的發哥(周潤發),她說是最友善一個。發哥會為遲到上機,在機艙向空姐逐一道歉握手,Tsar說:「道歉係一件事,佢仲會主動走過嚟握手,話剛才有影迷叫我簽名所以遲到。」

這位無架子的巨星,還有一件事,令空姐刻骨銘心。有次發哥由L.A乘機回港,一上機就睡覺,至凌晨醒來他請空姐給他一個麵醫肚。阿Tsar稱,一般頭等服務,空姐會為客人提供雲吞麵、燒鴨麵,甚至煲仔飯。正當空姐在廚房預備之際,發哥上洗手間經過見狀,即耍手檸頭說:「去經濟艙攞兩個杯麵畀我就可以,唔使搞咁多嘢,簡簡單單就得喇!」當日那位空姐,是發哥粉絲,之後她向食杯麵食得津津有味的發哥說:「我入行十二年,一直希望喺飛機上遇到你!」

臨落機,一般頭等客人都會向空姐點頭說句辛苦晒,但發哥卻這樣說:「希望下次見面唔使再等十二年。」此話令空姐非常窩心!

Tsar說:「一舉手一投足,一個溫暖眼神答謝空姐辛勞,我哋已感到被尊重,發哥無論去到邊,都係好識體諒別人,除在工作,佢嘅善良,同將心比己亦滿有光芒。」
  發哥除會為遲到登機向空中服務員逐一握手道歉,還有一次醫肚事件,令空姐感受他的體恤之心。
發哥除會為遲到登機向空中服務員逐一握手道歉,還有一次醫肚事件,令空姐感受他的體恤之心。

難忘天王扶一把


而另一個同是巨星級之人,Tsar代一位空姐朋友,公開向他說謝。「呢個又係一個巨星是如何煉成的真人真事。有一位巨星坐飛機頭等,由吉隆坡返香港。以我空姐朋友嘅觀察,對方好靜唔出聲,但非常有禮貌,每次食完嘢,空姐幫佢收拾枱面上嘅碗碟時,巨星都會用雙手將枱面上嘅物件交還畀空姐。雖然呢啲只係小動作,但足以見得佢好有教養。通常乘客雙手將枱面上物件交還畀空姐,呢種禮儀多數只喺日本客人身上見到。食完之後,空姐見到呢位巨星攞部電腦出嚟,密密咁睇住佢同另一位女士旅行嘅生活照。其實多年嚟呢一位巨星喺娛樂圈甚少緋聞,所以空姐憑住呢啲相片,得知兩人動態,估計應該係男女朋友關係。

到航班差唔多降落時候,空姐行出去機艙工作,並收拾細軟,剛剛遇到氣流,差唔多企唔穩之際,好彩得呢位正在企喺度執行李嘅巨星,伸出雙手扶住。我嘅空姐朋友形容當時感覺,嗰剎那即使神仙都企唔穩。當然大家都心知,其實巨星只不過出於一片好心,伸出援助之手,但我哋又覺得未必每位藝人可以做呢件事,所以對佢印象非常好。若干年後,就喺報紙上見到一則報導,呢位巨星參加當日喺相片中嗰位女士爸爸嘅喪禮。

呢位重情重義嘅好男人,就係天王劉德華,我嘅朋友好想多謝你,當日幫佢扶一扶,如果唔係,佢真係跌喺度出洋相喇!」曾經教服務業顧客之道的劉華,其巨星之道亦講求有禮。
 劉德華貴為天王,待人處事仍謙謙有禮,阿Tsar說他是少有會用雙手捧著餐盤給空姐收拾的本地客,雖然只是一個小動作,但足以帶出他對別人的尊重。
劉德華貴為天王,待人處事仍謙謙有禮,阿Tsar說他是少有會用雙手捧著餐盤給空姐收拾的本地客,雖然只是一個小動作,但足以帶出他對別人的尊重。
 有次機上遇氣流,劉華見空姐差點跌倒,他急時上前一扶,救了空姐不致在機艙出洋相。
有次機上遇氣流,劉華見空姐差點跌倒,他急時上前一扶,救了空姐不致在機艙出洋相。
 她以「勻淨」形容汪阿姐,是好客之一。
她以「勻淨」形容汪阿姐,是好客之一。

招待中東王子

在空姐生涯,Tsar亦遇過不少尊貴客人,如中東王子。「中東王子同公主一齊上機,其實機長都應該有呢個列表,然後我去駕駛艙同總機師講一聲,話有位中東王子喺我哋機上,佢話不如喺廣播中歡迎王子,但我話咁樣唔係幾好,因為保安問題,如果佢出咗咩嘢意外,我擔當唔起。」

EQ低皆因能力唔高

她處事細心,冷靜,是空姐的必備條件,問她在這生涯中,有冇試過受不了惡頂客人想反擊?Tsar說:「冇,因為我覺得呢份只係工作,無論喺事情上或者情緒上控制到,其實係自己本事。如果你控制唔到,只有能力唔高嘅人,先至無能力控制情緒,我自己覺得係咁樣。

如果你有聽我直播,都會發現我有時幾寸嘴。但有啲客人好有趣,你愈係怕事,佢就愈會踩多幾腳,即係如果你個人堅強啲,佢可能會尊重你,總之你畀到解決方法就可以,唔需要又跪又叩。」
 Tsar爆紅後仍不肯現真身,只接受電話訪問,她以一個爛gag解釋:「我係賭神女徒弟「賭夜香」!我一向唔鍾意對住鏡頭,所以連相都少影。」難怪她的身影,都只在舊片中出現的兩三張舊照。不過她定下目標,半年內達到十萬訂戶,或會現真身答謝粉絲。
Tsar爆紅後仍不肯現真身,只接受電話訪問,她以一個爛gag解釋:「我係賭神女徒弟「賭夜香」!我一向唔鍾意對住鏡頭,所以連相都少影。」難怪她的身影,都只在舊片中出現的兩三張舊照。不過她定下目標,半年內達到十萬訂戶,或會現真身答謝粉絲。