• 禁忌之林︱賓州保侵不力 還看高院︱林忌
  • 2020-11-06    

  • 禁忌之林︱賓州保侵不力 還看高院︱林忌

 

「成個下晝,都係收埋啲咩侵侵力保搖擺賓州呀,咩拜登連賓州都輸埋呀,然後又咩侵侵力保賓州都要輸呀嘅消息,其實你班男人無聊唔無聊,個gag都畀你哋玩足咁多年,玩爛晒啦,仲好笑咩?點解年年美國總統大選,都要玩一次先?」

「日日報紙都咩一次性接觸,一次性交易,一次性密碼,再加埋啲難頂到爆嘅新聞,咪搞到大家好大壓力,睇到抑鬱囉;難得有爛gag 笑下就好笑喇,唔係一陣China Joe 上台,想笑都笑唔出呀!」

「你班侵粉又係嘅,個個睇美國總統選舉,仲肉緊過香港嘅事咁,然後形勢落後,又立即信晒堆Fake news,咩超過100%投票率呀,又話人哋大量造假票呀,好心啦,今日在位嗰個仲係侵侵呀,如果拜登造假造到過100%投票率,仲唔立即入稟法院,告到對方甩褲?林鄭同班共產黨,就話隻手遮天,球證旁證足協足總足委全部都係我嘅人啫,家下侵侵自己係總統呀,法官係佢委任,參議員係佢黨友,FBI 同CIA 都係佢手下,有咩可以拎來搞,仲唔大搞特搞咩?執政同在野嘅分別,搞唔搞得清?」

「唓,班左膠又好得幾多呀? 2016年希拉莉輸咗嗰陣,咪又係指控人哋用Fake news 呃人唔公平,又話人哋收俄國佬錢?審咗幾年,咪又係根本冇證據,唱足咁多年又有冇道歉?嗰時又唔見你哋話要Fact check?明知美國係聯邦制,投票係由州嘅勝負決定,一早知係勝者全取,輸咗就喊苦喊忽,話少票嗰個贏好唔公道乜乜乜,好心啦!聯邦呀,每個邦獨立計呀,畀你中國人十四億加落去,人最多就代人哋話埋事好冇?仲有當年2000年小布殊贏戈爾又點?輸咗佛羅里達,就賴點票機出問題,不斷叫重點,點完又點都係輸,都仲係唔忿氣,仲要拍套片唱衰人,日日鬧人造假,家下風水輪流轉,講風涼話就最大聲,係咪好興奮呢?」

「左膠乞人憎就係人都知,但我最失望嗰班,係有班海外嘅中國民運人士;有班開TG 群組,或者Youtuber、 KOL 之類,又吹到咩民主最黑暗一天,美國民主制度已死之類,真係好心啦,人哋有法律同機制,去處理(如果有)嘅舞弊,輸咗就賴地硬,不斷吹到同香港或者中國一樣黑暗咁,其實你信唔信民主先?定係你覺得美國同中國其實冇分別?唔信美國嘅制度,咁你支持咩美國為首嘅民主制度呢?究竟嗰班係真心,定係『大家都係中國人』呢始終?」

「係啦係啦,最終個問題,都係我哋自己都冇票;我哋有票嗰啲選舉,成班就話射落海;冇票嘅,你嘈嚟又有咩用?家下邊個贏邊個輸,我哋再嬲都完全改變唔到賽果,何況最後嗰幾個未點完票嘅搖擺州份,侵都隨時再輸一兩個,例如賓州都不保,你仲講咩其他?輸賓州,再點都贏唔返啦!不如靜靜地,等睇侵爭高院,廢止嗰堆遲過點票日,都仲未收到嘅選票好過啦!保賓州,仲有得爭;贏高院,得天下呀!」

「重口味......」

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所