• 禁忌之林︱信人民幣最大 ── 願錢打救你︱林忌
  • 2020-10-30    

  • 禁忌之林︱信人民幣最大 ── 願錢打救你︱林忌

 

法國連環遇到恐怖襲擊,先有巴黎嘅歷史教師,在上堂時展示伊斯蘭先知嘅諷刺漫畫,來捍衛言論自由,因而被恐怖份子斬頭;星期四就輪到南部著名嘅旅遊勝地尼斯,又遇到一位伊斯蘭教極端恐怖份子,拎把刀入教堂殺三個人,一個七十幾歲嘅阿婆被斬頭,簡直就係喪心痛狂。

然而多個伊斯蘭國家,唔單止冇好似佢哋以往對中國咁表態,例如「支持維護國家安全」、「支持嚴正執法」、「反對干涉他國內政」,去支持法國嘅反恐活動,反而早前法國總統一句說話,就紛紛譴責法國總統,又話要杯葛法國貨──嘩!歧視法西斯呀,十惡不赦呀!法國總統馬克龍,佢究竟講咗乜嘢呢?講乜嘢激嬲全球伊斯蘭教徒呢?

馬克龍講咗句:伊斯蘭教是當今世界上處於危機的宗教 (L'Islam est une religion qui vit une crise aujourd’hui, partout dans le monde),話要改革法國國內的伊斯蘭教,去杜絕「外國勢力干預」,以及制止極端教派發動恐襲。或者呢句「講真話」,有「講大咗」之嫌,即係冇集中講極端教派,而係把成個伊斯蘭教都拉落水,之但係「有危機」,又點樣「歧視」?又點樣「侮辱」呢?

一堆伊斯蘭國家,例如以往支持中國實施國安法的巴基斯坦,就表示「傷害伊斯蘭教徒感情」,「激嬲伊斯蘭教徒」、以及「製造反伊斯蘭情緒」,呢個時候我就真係諗唔明喇,上個月習近平一再強調,要令新疆的「伊斯蘭教中國化」,來實現「宗教健康發展」,講到好似伊斯蘭教又唔健康,係「疆獨」,點解嗰時唔見巴基斯坦呢堆國家抗議呢?點解嗰時冇人話要罷買法國貨咁,去罷買中國貨呢?

法國佬真係蠢,馬克龍應該表示向習大大學習,話法國應該效法新疆,為伊斯蘭教徒搞「再教育營」,令「伊斯蘭教法國化」,來實現「宗教健康發展」,然後順便學中國拆清真寺咁,在法國大規模拆清真寺,甚至學中國咁強迫伊斯蘭教徒絕育,咁咪唔會被呢堆伊斯蘭國家投訴囉!你睇!呢堆國家唔單止冇投訴中國在新疆迫害伊斯蘭教徒,甚至仲有 37個國家在聯合國大會上,聯署支持「新疆治理」添!當中就包括伊斯蘭國家如巴基斯坦、敘利亞、阿曼、科威特、安哥拉、阿爾及利亞、蘇丹、南蘇丹、埃及等國!

新疆反恐佢哋支持,法國反恐佢哋反對,「伊斯蘭教中國化」佢哋支持,「伊斯蘭教法國法」佢哋就反對,你話點解呢?咪就係法國佬蠢,唔識學中國派人民幣,然後又唔識學中國搞「再教育營」,去捉晒班伊斯蘭教徒囉,同佢哋講人權喎,幾蠢呢?

有錢就有大晒,願錢打救你呀!唔單止伊斯蘭國家,連教宗都理得班地下主教拉嘅拉,死嘅死,繼續同中共簽約,連陳日君都唔見啦。以往香港硬係有班自命知識份子嘅左膠,成日問大家點解唔關心堆中東國家;關心?佢哋唔單止支持「港版國安法」,仲支持新疆再教育營,然後而家就鬧法國「歧視」,要杯葛法國貨,你話有冇咁樣道理呀?

一堆人權紀錄奇差無比嘅國家,走去關注由最高標準嘅歐洲人權法庭,所保護嘅法國伊斯蘭教徒,話關心佢地人權喎,有時,真係忍唔住苦笑……

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所