• 暖男爸爸|ViuTV一姐Hailey盼演學生妹 一哥強尼:有無做過阿媽?留畀真學生妹啦
  • 2020-10-24    

 

首個較立體角色

強尼和Hailey,被外界視為ViuTV的「一哥」與「一姐」。不過,他們坦言在綜藝方面或許駕輕就熟,戲劇方面則一直只是輔助性角色。直到是次《暖男爸爸》,算是難得的機會,能飾演故事線較豐富、較立體的角色。

「呢套劇對於我哋嚟講係重要嘅,因為我哋個台嚟緊第4、5年。過往嘅劇我哋好多時候都係參演相對輔助性嘅角色,我通常都好習慣飾演男主角嘅朋友,今次我都係。但係,今次個角色係立體好多喇,佢有自己好豐富嘅故事線。」

以Hailey飾演的Bianca為例,似是有齊起承轉合,結婚埋尾(好似係):「其實我個角色本身係個有錢女,之後經歷屋企破產、家人又分開、又同男友分手,幾樣嘢加加埋埋嘅打擊之下,係個幾無安全感嘅女仔,之後就去咗張可頤間保險公司到做,咁就開始咗我嘅second chance囉。」

強尼在劇中,有一半對手戲都是跟Hailey演。
強尼在劇中,有一半對手戲都是跟Hailey演。
強尼和Hailey均指是次角色,是故事線較為豐富的角色。
強尼和Hailey均指是次角色,是故事線較為豐富的角色。

搞笑擔當

關於《暖男爸爸》,外界幾乎把焦點全集中在主角鄭中基、張可頤身上。尤其前者,觀眾或多或少都抱著《行運超人》、《龍咁威》等印象去期待。然而,鄭中基在劇中主打溫情戲,搞笑部分就由強尼和Hailey孭飛。

「我哋兩個喺套劇裡面,負責一啲相對嚟講戲劇啲、搞笑啲嘅嘢。我哋認為自己係喜劇擔當,因為劇中佢哋嘅關係好多都好溫情、生活化,甚至有啲sad㗎。我哋就會跳出嚟用一個輕鬆愛情喜劇啲嘅感覺,擺返落去成個故事裡面。」

即場互窒

在鄭中基面前搞笑,可行嗎?強尼和Hailey賣關子不願透露,但見他們正正經經坐定定回答「期望之後能演怎樣的角色時」,一樣可以鬧出笑聲,就知不容小覷。

Hailey:「我覺得我仍然可以挑戰學生妹角色。」

強尼:「唔好啦!」

Hailey:「你咪嘈啦!」

強尼:「唔好,唔好,真係唔好!唔好,唔好!」

Hailey:「挑戰OK?人哋問有咩想挑戰吖嘛。」

強尼:「啲學生妹角色留返畀真正嘅學生妹做好無?如果你要做學生妹真係好大挑戰。」

Hailey:「你都做過胡子彤(28歲)嘅同學,都好大挑戰啦!唔大挑戰咩你覺得?」

47歲強尼:「講緊我哋畢業之後同齡啫,又唔係學生。」

Hailey:「你同胡子彤同齡喎,唔大挑戰咩?」

47歲強尼:「係囉,胡子彤咁老嘅個人,哈哈。你有無做過人阿媽?」

Hailey:「無喎,我點似呀?我點睇都唔似啦!」

47歲強尼:「你自己覺得啫,有陣時我去接放學啲阿媽都係你咁。」

Hailey:「我都想做阿媽嘅角色,都無人搵我做,可能啲人覺得我唔似都無辦法。」

47歲強尼:「你有種壞嘅感覺,你唔似人哋媽媽。你個人都唔生性,成日做埋啲唔生性角色。」

Hailey:「係咪呀?咁就啱喇,過多十年先做啦,仲有大把機會,可能下一套就係個未婚媽媽。」難怪強尼很多角色都是把口唔收、口花花。
二人雖不時互窒。
二人雖不時互窒。
但同時又笑聲不斷。
但同時又笑聲不斷。

暖的一面

一對好拍檔,在劇裡,感情戲可以合拍得連老闆都好奇「他們是否真的有路」。在戲外,就如現在畫面所見,能放心互開玩笑。當然,在需要的時候,也能給予對方一點「暖」。

強尼:「見係你爆啲真嘢畀你聽。我同佢嘅合作,比較多係《全民星戰》開始,兩年前左右,密集式日日由朝到晚,嗰時開始熟絡。有一日,突然之間同我講,我架車就泊喺廠出面,喺邵氏。佢無端端同我講:『可唔可以借駕車畀我?』我以為佢揸走,佢話唔係,佢話借架車畀佢,佢匿埋喺入面。我問:『使唔使陪你?』佢話:『你陪一陪我。』就借架車畀佢喺車廂裡面,即係嗰一刻佢唔得喇。嗰時我哋做緊啲嘢好開心、好hyper,但原來佢好唔開心嘅。」

Hailey:「咁我要釋放一下,如果唔係,個情緒好難搞,因為入到廠做綜藝節目要keep住好hyper,我又唔想喺好多人面前崩潰,咁咪借一借個車廂。因為個廠周圍都係人,基本上行去廁所都有人行嚟行去。」

強尼:「嗰次就係佢第一次顯示脆弱一面、內在一面畀我睇。之後我哋經常合作都會私下講自己嘅嘢,所以我哋就好熟。喺劇入面,佢會成日同張可頤分享自己嘅事,現實生活中我就係張可頤嗰個角色。」

服裝提供:

Hailey: SNIDEL

強尼:O.N.S (@onsclothing)

化妝: Sara Wong

髮型: Jeff Wu

採訪:Ethan

攝錄:余一樂

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所