• 禁忌之林|嘔心嘅偽愛國專業人士(林忌)
  • 2020-10-23    

  • 禁忌之林|嘔心嘅偽愛國專業人士(林忌)

 

「香港真係好多嘔心嘅愛國人士,例如最近有個上電視,借自己個女過橋,連蠟筆冇黃色都拎出來吹,你話幾核突呢呵?」

「哎呀,蠟筆冇黃色,唔知塊皮咩色呢?唔係成日講咩黃皮膚黑頭髮黑眼睛就係中國人咩?哎呀,咁連黃皮膚都冇,點做中國人呀?」

「嘻,下次畀人叫『食蕉啦』嗰時,咪可以大大聲反駁,咩呀!香蕉黃色㗎,屋企冇呀,你含第二樣啦!」

「好玩唔玩,玩黃蠟筆?梗係玩紅色啦!紅色好呀,鍾意玩蠟,就索性滴蠟,大大聲同記者講,我全身都紅色,由底褲到胸圍,全國河山一片紅!」

以前TBB嘅奀星就走光搏上位,被人笑低俗;家下就到政治奀星鬥紅搏上位,肉麻當有趣;你揀邊樣呀?低俗居然好啲,真係低處未算低!

鬥低B?有咩好橋?不如你話畀我知呀!唔緊要,我哋有最專業嘅演員,可以向佢學習演技──何君堯中國政法大學名譽博士!我覺得大家搞錯咗,唔應該肯定佢在法律界嘅成就,而應該肯定佢在演藝界嘅成就,大家都是博士,不要分那麼細!

生果報訪問佢,對於如果英國剔除佢註冊律師資格,何君堯嘅回應,簡直就係100分:「損失嘅唔係何君堯,係整個英國政府!」Come on 何Baby,呢句真係好有霸氣!霸到大家都啞晒!巧驚驚啊!英國政府真係好驚損失一位咁有才能嘅律師呀!係英國政府嘅損失呀!Boris Johnson 嚇到瀨尿呀!

啊「何已完」,既然損失嘅係英國政府,點解要答記者,話會參與網上聆訊,並提交抗辯書,去阻止英國政府損失呢?唔通好似香港班英籍人士咁,身在曹營心在漢?應該主動放棄,好似幾年前佢寫畀港大校長封英文信咁,霸氣回應英國當局 “Could you just confirm if my complaint against Mr. Benny Tai is being properly and officially processed? Please answer my question directly.” (2017 年信件真實對白),去投訴返轉頭,令英國政府損失先係嘛!你諗下,被褫奪ARU個名譽博士,就換來中國政法大學嘅名譽博士;唔做英國律師,咪立即做中國律師囉!愛中國,點解唔做中國律師?仲要個英國律師牌來做乜呢呵?

仲有一位要再介紹畀大家認識,佢就係港大深圳醫院嘅院長盧寵茂啦!呢兩日佢同記者講,話正與香港政府與醫管局商討,要叫香港資助佢間深圳醫院醫病,由香港公帑,津貼擁有香港身份證嘅中國人,在深圳醫病喎!喂,香港人係咪中國人先?你是不是中國人?唔係話「大家都是中國人」咩?住在「中國香港」,就話睇「中國香港醫生」,你住在「中國深圳」,你睇咩香港醫生?搞港獨呀?

住深圳就係深圳人,就叫深圳去照顧你嘅福利,就共享中國深圳人嘅榮耀!唔係話GDP過香港咩?唔係話深圳更有競爭力咩?唔係話深圳係大灣區龍頭咩?唔係話中國醫生質素高,護士細心又貼身咩? 做乜歧視中國醫生?歧視中國護士?歧視中國完善嘅醫療制度呀?點解要提供「次一等」嘅香港「黑醫」、「黑護」畀神聖偉大嘅中國人睇病?睇唔起中國醫護呀?歧視法西斯呀?愛中國做中國人,睇中國醫生,搵中國護士,你叫咩香港政府津貼深圳人,去歧視中國醫護先?食錯藥呀?

係咪好奇怪呢?黃皮膚人唔用黃蠟筆,中國名譽法律博士唔做中國律師,卻力保英國律師牌,做中國人唔睇中國醫生,要搵政府津貼佢哋睇香港醫生,點解呢?點解呢呵?

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所