• 有錢親戚眼中的窮人|52歲黃子雄疫市揈錢未愁過:賺嘅錢夠廿年用就OK
  • 2020-10-23    

 

在TVB常扮演專業人士及有錢人的黃子雄,謙稱自己在現實中並非富戶,頂多是家境中上。而在疫情之下,他的工作量亦沒太大影響,難怪放膽如常消費,日前連環掃名店。他更對本刊表示:「總之賺到嘅錢,足夠嚟緊十幾二十年用就OK。」

有多餘錢就會買名牌

早前黃子雄去名店做西裝,出一分力「推動」香港經濟。由於他不時為大品牌活動做司儀,要打扮到官仔骨骨,所以對西裝都好講究,細心揀西裝布料。之後再去睇袖口鈕,相當注重儀容。

咁都未夠喉,跟住他去買古龍水,怪不得52歲的他,咁有「男人味」啦!然後再試牛仔褸,購買慾強勁。

黃子雄坦言:「有時一啲奢侈品,例如我鍾意買名牌衫,如果有多餘錢就會買。」

言下之意,他連環掃名店,即是有多餘錢。疫市仍然生活得輕鬆稱意,真是不簡單。

原來疫情期間,他的工作未停過,之前播完的無綫劇《過街英雄》及《C9特工》,他有份演出; 現在播出的《木棘証人》,又有他份。遲些出街的《踩過界II》、《使徒行者3》、《陀槍師姐2021》及《七公主》,亦有他的角色。目前則在趕拍《金宵大廈2》,一劇接一劇。

他在外面亦有接商業活動,山大斬埋有柴,直言覺得自己幸運,工作沒甚麼受疫情影響。
黃子雄說:「我唔係乜嘢御用有錢人,我經常都話自己最多係中上。」
黃子雄說:「我唔係乜嘢御用有錢人,我經常都話自己最多係中上。」
近期仍有接大品牌活動。
近期仍有接大品牌活動。

冇靠屋企買車買樓

「雖然媽咪以前做英文書批發,環境OK,但屋企唔係勁有錢嗰種,我真係講過很多次,我唔係乜嘢御用有錢人,我經常都話自己最多係中上,我哋身邊係有好多有錢嘅親戚,我哋係poor cousins(窮表親),即係比起佢哋,我哋係窮人,但算係比上不足、比下有餘啦,唔係非常有錢嘅人。」他強調。

他表示一直自給自足,「我嘅一切都係自己賺嘅,冇攞過媽媽嘅錢,讀書時當然有啦,攞零用錢,但我出身做第一份工之後,就冇再攞媽媽嘅錢,全部都係自己賺,樓同車都係自己買。」

雖然愛買名牌逗自己開心,但他絕不會亂花錢。

「我做嘅都係好保險,每年銀行同我做風險評估時都係一二級,少少增長,做嘅都係保本。我本身唔鍾意買好多物業,因為我唔喜歡有負債,有人可能不斷買樓去供,我就唔太喜歡,我會預計到大約今年會使幾多錢,總之賺到嘅錢足夠嚟緊十幾二十年用就OK。」

錢夠廿年用,對好多人來講都是遙不可及,黃子雄形容自己是窮表親,真係太「謙」啦!
現正趕拍《金宵大廈2》。
現正趕拍《金宵大廈2》。
在TVB以外,他有其他的工作機會。
在TVB以外,他有其他的工作機會。

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所