• 【厚禮賀前度】陳家樂生日即傳未婚懷孕 27歲余香凝8號波下認結婚
  • 2020-10-13    

 

昨日(10月12日)係陳家樂34歲生日,佢舊愛余香凝隨即送上「生日禮物」,就係疑似陀B做人母嘅好消息喇。消息傳咗十幾個鐘之後,余香凝亦終於宣布要做人妻了。

10月12日是陳家樂生日。
在前度陳家樂生日當天,余香凝傳出未婚懷孕。今日8號風球下,余即貼相宣布結婚。

陳余完結三年情

回到未紅時,陳家樂同余香凝拍拖3年愛得高調,不時上載情侶合照,又公開講到計畫5年內結婚。

點知,原來佢哋一樣共患難易,同富貴難。2017至2018年間,陳家樂憑大台劇《逆緣》上位,余香凝又因《骨妹》獲香港電影金像獎提名「最佳新演員」。人怕出名豬怕肥,佢哋好快成為傳媒嘅追訪對象,余香凝更被踢爆上保險才俊屋企過夜。

咁搞法,分硬手啦!陳家樂之後接受傳媒訪問含淚認分手,而余香凝就否認有第三者,解釋上保險才俊屋企只係通宵開會傾生意,又強調唔係孤男寡女,仲有其他生意夥伴在場。
回到陳余相戀時,二人不時高調曬合照。
二人曾指計畫5年內結婚,但說時遲那時快,3年情在2018年完結。

各有新歡

事過境遷,有指陳家樂因為同連詩雅合作大台節目《12個夏天》撻著,雖然當事人唔願意多談感情事,只係官方答案「好朋友」,但始終無正式否認戀情,明嘅。

至於余香凝,有指佢繼續同保險才俊發展,但Keep住唔認,今年7月仲喺訪問入面話未有對象,而且唔會接受閃婚,不過就期望30歲前可以做阿媽。

咦!喺前度陳家樂昨日33歲生日就傳出未婚懷孕,其實fit晒余香凝要求喎,無對象、唔閃婚但又生到仔。
余早前曾出POST指:「紀錄這一刻。」當時已有人猜她不是結婚就是懷孕。

余傳懷孕趕結婚

睇返余香凝社交網站,佢幾日前突然出post話要「紀錄這一刻」,當時已經有人留言估佢唔係結婚就係有BB㗎喇。不過,睇返余香凝最近post嘅相都仲係好瘦唔似有餡,而且仲食緊大閘蟹添,大肚婆應該唔食得喎,唔通收錯風?偏偏,余香凝無否認大肚,只係答傳媒「私人事唔回應」,相當耐人尋味。

消息傳足十幾個鐘,余香凝終於出post曬婚照,但懷孕一事隻字未提,又唔公開老公身份,而外界一般認為仍係嗰位保險才俊。

「感激上天讓我們遇上,即使未來充滿着未知,只知道餘生都會和你手牽手一起過每一天,一起創造屬於我們的天地! 多謝咁多朋友傳媒祝福,全部都收到了!始終另一半同埋屋企人都係圈外人,所以希望大家留番啲空間俾我同我嘅家人。」余香凝網上宣布。

----------------------------

【圖太郎圖表秘笈課程 發掘出蠃錢機會】圖太郎| 網上直播講座

立即了解更多 ]

-----------------------------

守住新聞自由 和你撐計劃每月$300起撐《壹》仔

按此了解更多

壹呼百應 號召有心人 請香港人睇壹週刊

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所

-----------------------------

【《壹週刊》昔日紙本檔案庫】

30年壹仔經典 壹壹重現!