• 【禁忌之林】我睇緊啲乜?(林忌)
  • 2020-10-09    

 

今年諾貝爾和平獎,各大雜誌與賭場莊家預測,最高呼聲得獎嘅,WHO? 唔係問乜水,係講緊世界衛生組織 (World Heath Organization)!一個累到全人類雞毛鴨血,去到四月都反對戴口罩嘅腐敗無能組織,再加埋嗰位事後孔明,不斷擦習總鞋嘅譚德塞,居然被列為奪獎熱門?我睇緊啲乜?

睇返香港武肺又爆第四波,民生唔理疫情唔理,就日日去批鬥小學生同教師,吹到有教師「宣揚港獨」然後被釘牌,睇下份工作紙?叫你睇完大氣電波嘅電視節目,討論點解有人支持港獨--咁就變咗「港獨」?冇嘢呀?

討論點解,正如問你點解有人飢渴到要J林鄭,或者連登點解有人個 post,題目係「香港某女名人流出!僅穿貼身衣服於公眾場合將(張)開雙腿。」,福你個佳 click 入去,就見到葉劉踢腿晨運照一樣,連隔夜飯都嘔出來!你可以自行解讀,例如開 post 嗰個毒不可耐,又或者反過來你認為,林鄭加葉劉,係香港最靚嘅美女,咦?唔通討論就變咗支持,貼葉劉自拍,就等如支持煲老藕呀?好心啦!我睇緊啲乜呀?

點解大家寧可討論呢啲核突嘢,都唔想再討論更加正經嘅話題?係呢,因為啲垃圾已經臭到冇任何正常討論嘅價值──例如葉劉,同你討論佢十月一號登咗紐約時報篇文好冇?紐約時報呀!好 Grand 呀,睇下佢寫乜?題目係《Hong Kong is China, Like It or not》──咦?既然香港就係中國,咁邱騰華同成班高官,之前投訴乜嘢美國要求你改標籤,要廢 Made in Hong Kong,而改做 Made in China呢?Hong Kong is China, Like it or not──美國反港獨,幫你香港主動改做中國,又唔開心呀?所以做咩要去世貿投訴呀?

美國人睇完葉劉篇文,應該都會問:「我睇緊啲乜?」葉劉篇文最後一段,呼籲外國政府唔應該以西方國家標準,去量度香港,而應該用中國與香港嘅距離──開放、人權、自由、法治來量度喎──美國政府,淨係話以往畀香港特殊待遇,係因為當香港係可以同西方世界睇齊嘅地方!家下你代香港「自認」,話香港唔應該同西方比,只應同中國比?咁所以咪要取消所有特殊待遇囉,去美國幫特區政府倒米呀?一定係身在曹營心在漢啦!

又反過來問,葉劉唔通忘記咗,中國話自己係全世界最大嘅民主國家,今年年初中國外交部話,中國人權係處於歷史最好時期!葉劉唔通唔同意,認為中國人權差過香港?嘩嘩嘩嘩嘩!我睇緊啲乜?唔係話要大家承認中國「以法治國」,要相信中國嘅「陽光司法」咩?

12港人被捕,就要信中國,要畀香港人在中國大陸投票,又要信中國嘅制度,但係轉頭有病,就要學工賊會咁講,唔願在中國醫,要返香港醫呀?日日話台灣係中國不可分割嘅一部份,話承認台灣政府,甚至只係搞「司法互助」,就變咗「台獨」,轉頭就將陳同佳「送台」,而唔係「送中」嗱?香港人殺香港人,死者父母又係香港人,突然間又要把香港人,送去一個你唔承認嘅政府去處刑?我睇緊啲乜呀?

所以日日睇垃圾新聞,已經令香港人麻木晒,就好似你對住葉劉自貼嘅「豔照」,開住但都嘔唔出一樣,證明大家都已經病入膏「盲」──啊,大家都好想係盲?我睇緊啲乜呀??????????

----------------------------

《噴火30年壹驚艷 性感女星典藏集》特刊現已出版,各大書報攤及便利店有售,每本港幣九十八元正。

當年《壹週刊》鏡頭下的李嘉欣、黎姿、朱茵、舒淇、邱淑貞等三十位經典港姐、性感女星,一一復刻,艷壓全港。

了解更多

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所