• 做和事佬都可以種出騙局│刁佬
  • 2020-10-08    

  • 做和事佬都可以種出騙局│刁佬

 

近期雖然股市暢旺,但實體經濟中搵食艱難,生意靜侷不如賭博,又係老千行走江湖的最佳時機,做得老千自然頭腦靈活,逆境創造機會,「山不轉路轉、路不轉人轉」。在逆境下債務違約上升,債主收唔到錢,一係叫債仔坐低傾吓,睇吓當埋底褲值幾錢,一係法庭見,一言不合即打交,我哋叫以上調解債務的過程為仲裁(Arbitration),主持仲裁的和事佬叫仲裁人(Arbitrator),律政司司長鄭若驊就係呢方面的國際仲裁專家。

早前國內出現咗好多類似的公司,不過就叫「解債公司」,顧名思義即係解決債務及違約糾紛。生意不景自然多人欠債不還,國內的解債公司有它的生存空間,不過除了解債之外仲做埋理財產品。有時候解債公司遇上良好的投資機會,亦會籌錢落場,情況就如香港好多二按財務公司做法,在債仔違約之時,只要抵押物業低於市價,財務公司會拍買債仔抵押的物業,從面賺取差價。解債公司處理問題債務,乘勢推出理財產品,如果債仔有抵押資產,仲裁人又落力調解,一條龍服務,最後大家有錢分,如果可以落實確係幾好。

祖國人才輩出,聽落咁好的事當然個個都做,做到遍地開花。尤其華中地區,要突圍而出必須搞搞新意思。有班高手發現解債公司的集資能力,但又唔係每一次「解債」都會圓滿成功,當一大班兄弟落力賣產品之後等你出傭金,而同樣時間又有一班投資人手持理財產品,等你派息,咁點算?

最後高人獻計,解債公司買間上市公司返嚟,債務轉股份,將啲不良資產換成股票,而投資人亦由投資理財產品,華麗轉身成為上市公司股東。人好得意,我哋覺得「欠債還錢天公地義」,唔還錢會殺人放火,但調返轉股票輸錢就比較心安理得。態度決定命運,既然態度如此,命運亦如此。有好多投資者買完解債公司的理財產品後,發現當初承諾的收益率不兌現,手上股票全是低流通量的廢紙,理財產品到期後,拎住合約上去解債公司發現人去樓空,才發現一切皆空虛,自己身陷騙局中的騙局。

事件發生在祖國,在偉大的行政指令下,好快就撲滅罪行,以非法集資之名取締解債公司。其實典型的騙局都係聽落風險低回報高,唔係點氹到人落疊?解債理財產品以高收益及債務保本為招徠,吸引了不少風險胃納較低的投資者,可是在產品到期時又實現唔到,就釀成騙案。香港法律健全,大眾的投資意識亦高,暫時未見以上手法在香港流行。不過中港日漸融合,在兩地的千門精英相互交流經驗之下,相信未來的橋段只會更精彩,更有創意,大家拭目以待。

作者簡介:

刁佬

遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。

--------------------------------------------------------

【圖太郎圖表秘笈課程 發掘出贏錢機會】圖太郎| 網上直播講座

立即了解更多

----------------------------

《噴火30年壹驚艷 性感女星典藏集》特刊現已出版,各大書報攤及便利店有售,每本港幣九十八元正。

當年《壹週刊》鏡頭下的李嘉欣、黎姿、朱茵、舒淇、邱淑貞等三十位經典港姐、性感女星,一一復刻,艷壓全港。

了解更多

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所