• 【壹週和你股】巴巴、美團一對|譚朗蔚
  • 2020-10-07    

 


特朗普真係一個Thanos嚟!除了因為佢個樣都有少少似,最重要是因為只要佢撻一撻手指(出個tweet),好多人個倉(尤其是槓桿、期指)真係可以無左一半!說的是佢老人家隔夜忽然煞停刺激經濟的方案,致使本來企得穩穩的美股來一記「臨尾香」,嚇到金都散埋,破壞力認真誇張!

外圍美股尤其係納指同七隻主要成分股的走勢基本上梅花間竹,一日企到、一日企唔到(我講50天線)這樣的行情我們無謂去博,唔通真係今日買完、聽日止蝕、後日再埋過咩?至於恒指,我一直認為今次跌浪反彈的戰線不在24,000,而是在24,500的。所以今日再彈,我並不感到意外。

強勢的股,依然要數科技,其中ATMX裏頭,阿里巴巴(9988)同美團(3690)各自各靚。巴巴在長假期前的星期三已經破位,企穩雙底頸線273,上望291歷史頂。至於美團就慢少少,上日星期二才突破,企穩了頸線250睇280。兩隻的均線一直無死叉過,可以話是一個強勢的延續。

至於基本因素,前者好簡單,就是炒螞蟻金服。好事越來越近,金管局不斷買入美元來沽港元,反映了資本市場有好強烈的入錢反應。至於美團,上次大熱倒灶簡直是令人咋舌,今次(11月13日)恒指季檢,我相信甩轆的機會唔大,再甩真係無言。兩隻短炒,258同232係兩者的止蝕。

Stevan將會在壹仔開壇講股,一週兩次,揉合技術分析同基本因素,向讀者派發貼士,實行「和你股」!我哋亦歡迎壹會員將投資的問題,發email至 nextfinance@nextdigital.com.hk ,Stevan會在本欄親自解答。

作者簡介:新一代股評人譚朗蔚(Stevan),以嬉笑怒罵和幽默分析見稱。股民以為佢只靠外表搵食,但佢偏以勤力分析,揸緊宗旨取勝。佢曾改編歌詞,唱盡股民心聲;又cosplay丁蟹、悟空及大帥哥搞投資Talk Show,顛覆傳統,成為「最貼地股評人」。

Stevan最信奉「萬種行情歸於市」,認為炒股最緊要就是跟勢。佢深信「破頂無頂,天空是頂」,專門為大家發掘強勢破頂股份,佢話「上面無蟹貨無阻力,讓子彈飛」!

----------------------------

守住新聞自由 和你撐計劃每月$300起撐《壹》仔

按此了解更多

----------------------------

壹呼百應 號召有心人 請香港人睇壹週刊

按此了解更多