• 【壹週和你股】憂阿侵病火中燒 中芯又穿|譚朗蔚
  • 2020-10-05    

 


週末到依家為止,市場最關注的應該是特朗普的病到底點?有說法話佢最快今晚出院,無事;但又有消息指從不同渠道得知佢病入膏肓到抖唔到氣。講真,佢近日發放的片段都唔肯定係咪近日拍的,依我愚見,按照目前市況,都是等佢老人家確確實實出院或者做live,之後再睇睇市場反應先定奪後市策略比較好。

至於有人關注假若特朗普今次唔死,會唔會更加敵視中國害到佢雞毛鴨血,我覺得不會,因為特朗普本身敵視中國的程度已經高到無得再提升。個市一路一路受壓,相關股一路一路挨沽。老實說,我一早都有晒心理準備,大型中概會一隻一隻咁死,係你地以為會無事啫,所以,中芯(981)呢類真係要避之則吉。

股份在上月初裂口低開,乃受累美國可能制裁公司的傳聞。股份後來反彈,一度彈過去裂口底20.05樓上但是好景不常,技術上,嘗試補裂口但是走得不遠,回頭折返,甚至要失守當日(最恐慌日)的收市價18.24。本身,股份多頭排列被多重的死亡交叉嚴重破壞已經不會是我的考慮之列,至此,更加不作考慮。

今日無北水,加上大市高開得太緊要、太誇張了,因為在高位的承托力不足並不是意外,相信恒指依然是處於跌浪反彈的格局,這看法不會改變。至於我過往推介過的股份,例如是復星醫藥(2196)今日的表現就麻麻地,要逆市跌,不過佢不嬲同市的關聯性低,都唔怪得佢的,不穿30.60的止蝕位繼續等消息啦。

Stevan將會在壹仔開壇講股,一週兩次,揉合技術分析同基本因素,向讀者派發貼士,實行「和你股」!我哋亦歡迎壹會員將投資的問題,發email至 nextfinance@nextdigital.com.hk ,Stevan會在本欄親自解答。

作者簡介:新一代股評人譚朗蔚(Stevan),以嬉笑怒罵和幽默分析見稱。股民以為佢只靠外表搵食,但佢偏以勤力分析,揸緊宗旨取勝。佢曾改編歌詞,唱盡股民心聲;又cosplay丁蟹、悟空及大帥哥搞投資Talk Show,顛覆傳統,成為「最貼地股評人」。

Stevan最信奉「萬種行情歸於市」,認為炒股最緊要就是跟勢。佢深信「破頂無頂,天空是頂」,專門為大家發掘強勢破頂股份,佢話「上面無蟹貨無阻力,讓子彈飛」!

----------------------------

守住新聞自由 和你撐計劃每月$300起撐《壹》仔

按此了解更多

----------------------------

壹呼百應 號召有心人 請香港人睇壹週刊

按此了解更多