• 【壹週和你股】恆大係垃圾,不過唔係日日臭|譚朗蔚
  • 2020-09-30    

 


今早個市的焦點落在美國總統候選人的首場電視辯論。眼見特朗普的攻勢相當進取,幾乎無理過個moderator的存在(moderator係連一個完整問題都問唔到架下),拜登相對下風。市場憧憬特朗普連任對政策的延續性有利,美股期貨一度炒高,刺激恒指在基金的季度結算日升過500點。

國慶和中秋節日臨近,大市在今個星期只得三個交易日,反彈的行情大致是符合了我的預期,因為上個星期恒指處於極度超賣。所以,我便keep住同大家說:個股的走勢唔靚是事實,但是基於我們對個股的理解,知道佢地唔係垃圾,無必要人驚你又驚,人踩人趕著在低位處賤賣股份。

連日來無北水,市況的交投淡淨,異動的股份便買少見少,因此好難做任何的推介。加上大市不過是跌浪反彈,進取性的加倉不適宜。不過,今日倒想同大家談談恆大(3333)系到底是不是見底。首先,恆大系不嬲無隻正經,不務正業非常。我想,這是上樑不正下樑歪的結果,正常的。

上星期五債券急跌,是危機警號。始終,股市有老散,債市就無,因此債市的資金流同波動是好值得參考和反映到真實的。股價在連日來急跌、急升、再急跌、然後急升,最新的消息是集團說服了一定持股的股東承諾不減持,對股份來說,算是消除了短線的沽壓,有利於短線超賣反彈。

不過,垃圾始終都是垃圾。垃圾有一日唔臭,並不代表你就可以質入口。須知道,云云內房在去年大賣特賣,個個盈喜的時候,恆大連番盈警。這個是鐵證如山,證明人做佢做,佢係特別失敗。毛利只有三成的發展商打個七折賣樓,等於用成本價賣樓,點解要咁做?證明了佢好等錢洗。

技術上,10天、20天線跌穿50、100同250天線,死亡交叉處處,應該可以說是空頭明顯,長跌長有的。不過,經歷完一番波折,反彈而在低位打造了一個平台支持,突破17.40可以望21,再多都無。即管看看市場對物管分拆的看法如何,有貨的粉絲們睇位走人,唔好以為要共度人世。

Stevan將會在壹仔開壇講股,一週兩次,揉合技術分析同基本因素,向讀者派發貼士,實行「和你股」!我哋亦歡迎壹會員將投資的問題,發email至 nextfinance@nextdigital.com.hk ,Stevan會在本欄親自解答。

作者簡介:新一代股評人譚朗蔚(Stevan),以嬉笑怒罵和幽默分析見稱。股民以為佢只靠外表搵食,但佢偏以勤力分析,揸緊宗旨取勝。佢曾改編歌詞,唱盡股民心聲;又cosplay丁蟹、悟空及大帥哥搞投資Talk Show,顛覆傳統,成為「最貼地股評人」。

Stevan最信奉「萬種行情歸於市」,認為炒股最緊要就是跟勢。佢深信「破頂無頂,天空是頂」,專門為大家發掘強勢破頂股份,佢話「上面無蟹貨無阻力,讓子彈飛」!

----------------------------

守住新聞自由 和你撐計劃每月$300起撐《壹》仔

按此了解更多

----------------------------

壹呼百應 號召有心人 請香港人睇壹週刊

按此了解更多