• 【月薪6萬變年薪千幾蚊嬲爆離巢】阮德鏘批大台制度刻薄:買「面具」錢都慳番
  • 2020-09-27    

 

上月狠批港姐騷的阮德鏘(Johnson),01年加入大台,高峰時月入達六萬,直至04年公司轉制度,他在每年一騷制之下,突由月薪六萬大減變年薪只得千多元,令Johnson憤然離巢,他憶述當年談續約時的情況:「因為樂小姐上場,就開始轉制,變成一騷。當時轉一騷,因為坦白講,到而家我依然係話自己唔生性,因為當年《K-100》年代,每星期有一個我哋叫嘅大K,仲有其餘細K,每個月人工差唔多有六萬。直至拍完《大唐雙龍傳》返港後,就開始轉制,話公司好感激你,覺得呢一年表現都好好,當時仲好開心,會沾沾自喜,然後話公司決定加薪五十蚊, 但之後話叫我要同公司共渡時艱,我話絕對無問題,即係點樣?就係一騷。因為我數學好差,本身大約千幾蚊一騷,然後問一年即係有幾多錢?對方話一年即係一個騷。即係你加我五十蚊,我就有千幾再加五十蚊,係我一年嘅騷錢,對方話無錯。我話一年只得千幾蚊?然後就呆咗,問咁樣即係點?就即係得一騷囉!然後就無再續約,決定離開,因為當時會覺得你玩緊咩呀?呢個係我嘅職業,唔係副業喎。」雖然事隔多年,不過Johnson重提此事時,仍然十分勞氣:「而家係靠你搵食,你張卡嘅簽帳額都有一萬蚊啦,然後你話我知一年薪酬只係千幾蚊?唔好玩啦!」

阮德鏘01年加入大台,做過《K100》主持,亦拍過不少劇集。
阮德鏘是粵劇名伶阮兆輝及尹飛燕之子,自小便在戲曲界浸淫。

Johhson是粵劇名伶阮兆輝同尹飛燕的兒子,七歲已經加入戲曲界,為何「樹大好遮蔭」下,仍然選擇加入大台?「去爸爸班底都只係揸支棍企側邊,排名最後嗰個。你知道年輕人都血氣方剛,會覺得究竟係你嘅人厲害,定係我比較弱?當時會覺得爸爸係咪同我鬥氣?咁不如算喇,然後報考藝員訓練班,考完、畢業、簽約,然後就離開唔再做。然後《烈火雄心》、《K-100》,一直拍落去。」

加入大台前,Johnson從叔父輩中聽聞,父親(阮兆輝)曾與兩位大台中人「有啲拗撬」:「之後我知道一位係綜藝科主管,另一位係戲劇組主管,一位何(麗全)先生,一位曾(勵珍)小姐。當時都覺得唔知點算,但無論如何,最後又捱過咗。」

以為Johnson身為「星二代」,可以「因父之名」而得到「著數」,結果反而遭人「單打」,他說:「喺TVB同做戲曲係完全兩回事,戲曲係一個舊社會縮影,即係有叔父輩,會有人帶住你;電視就相反,總之三個月學習,三個月免費勞工,即係襟撈爛做無投訴,返工準時會早到。訓練班畢業後就開始做茄喱啡,最初三個月由羅冠蘭教導,然後實習三個月,半年後就自由發揮,唔會再理你,你覺得無問題就繼續,唔得就會消失。呢個時候,唔會有好多叔父睇住你,反而要靠自己去闖,遇到咩嘢對手、對方係咪願意教你、或者燈位問題,我曾經畀電視台啲叔父話,「得啦,德鏘企喺度得喇,掂呀,我都無晒燈光!」即係我遮咗啲燈光。」

畢業於第17屆藝員訓練班的阮德鏘,同班同學有鄭世豪(左一)、蕭徽勇(右一)及何綺雲(前中)。

在大台短短數年,Johnson感歎過往風光的大台:「點解今日會變成咁樣?」,他分析主要原因是制度問題:「我經常都話,細公司講感情,大公司就講制度,制度愈嚟愈刻薄,就連買面具嘅錢都欠奉,會撕爛面具。我哋經常都話,其實唔係變咗,只係現形。我哋當年加入嘅時候,仍然聽到有PA可以升導演,有導演升到監製。然後無耐就話再無內部晉升,提升嘅都係外來人,即係你係PA,就做一世都係PA,咁點樣打仗?如果有得升職,有向上爬機會,每個人都變成杜琪峯,個個都想搏。而家無得升,咁做嚟為咩?做死一世都係咁樣,咪求其囉。」

阮德鏘曾參演電影《色‧戒》,令他感受到另一片天。
阮德鏘曾北上工作,做過演員助理、派飯,甚至攝影助手。
現時阮德鏘除了幕前演出,還有戲曲及電台工作。

離開大台後,Johnson決定北上發展:「因為當時發展唔理想,所以有咩工作都會去做,我覺得呢個經歷都係一件好事。當然學習過程會好辛苦,有段時間留喺北京,其實做過演員助理、派飯,甚至攝影助手。」他續說:「乜嘢都要去做,否則搵唔到食」肯捱肯博又肯做,令Johnson有機會接拍李安執導的荷里活大片:「拍《色,戒》時,我係浸醉於電影世界,原來有化妝車、自己嘅獨立廁所,有好多荷里活式的東西,覺得呢個世界好大。」曾經參予大製作,內地低成本製作也試過的Johnson,今天的他不單在幕前演出,電台節目主持、戲曲舞台監督,不同範疇也能看到他的身影:「所以好多時候要接受命運,係咁樣安排就要去做,順住條路去。」


攝影:Steven Wu

化妝:Jessie Chan

髮型:Vanessa Kong@HAiR

鳴謝:山日比製作有限公司

----------------------------

請即預購《噴火30年壹驚艷 性感女星典藏集》特刊,當年《壹週刊》鏡頭下的李嘉欣、黎姿、朱茵、舒淇、邱淑貞等三十位經典港姐、性感女星,一一復刻,艷壓全港。

自取優惠價 港幣$83【按此搶購】

包運費價 港幣$110【按此搶購】

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所