• 【禁忌之林】試過被強姦 以後就會接受(林忌)
  • 2020-09-19    

 

「只要你親身體驗過,即使第時強制迫你做,你就唔會再有不安」

講呢句嘅係色魔?係淫蟲?係賤男?唔係,係林鄭月娥──話有百幾萬人參加「全民檢測」,試過就知「簡單安全」,第時如果政府需要「強制檢測」,市民就唔會再有不安喎。

講出口喇,最初就同你講自願;搞搞下就話既然自願咁多人Okay,下次就不如強迫啦,至於點解「強迫」可以係一個選擇?點解「多人自願」,然後就等於可以「強迫」?究竟呢種係咩邏輯?中國邏輯囉!證明最初講自願係呃你嘅,目的就係用來第時可以強迫你,而且信佢「自願」嘅,都成為咗佢幫兇,變相成為佢哋第時可以強迫市民嘅藉口!

當一個咁樣嘅特首,又自稱在天堂留咗位畀佢,你就會忍唔住問,究竟呢個「天堂」係乜嘢呢?「天主,感謝你讓我成為中國人,我願意與別人和諧共處,我要學耶穌般熱愛國家民族」──呢啲沒有最黐線,只有更黐線嘅教科書內容,你以為係笑話?唔好意思,係真實嘅「天主教教育事務處宗教及道德教育課程發展中心編寫」、再獲樞機主教湯漢「支持和祝福」嘅小學教材。

耶穌熱愛國家民族都講得出?冇嘢呀?的確耶穌係猶太人,但當時只有羅馬帝國,用今日「中國人」嘅邏輯,即係「自古以來」佢都係意大利人。耶穌被吊死在十字架,理由係佢煽動猶太人「反羅馬皇帝」,咁請問題耶穌熱愛咩國家?又熱愛咩民族?呢種超越時空得來,仲要完全冇 sense 嘅歪理,究竟係咩人寫出來?

係呢天主教教徒,點解要反抗意大利政府先?點解梵蒂岡要搞「梵獨」,拒絕成為意大利不可分割嘅一部份先?梵蒂岡位於羅馬,「自古以來」都係意大利不可分割嘅一部份,幾乎人人都講意大利文,以及拉丁文(唔好意思,用中國邏輯,拉丁文都係「自古以來」意大利文嘅一種「方言」),甚至飲食唔係 Pizza 就係意大利粉,因此「大家都係意大利人」,點解要搞「一意一梵」,分裂祖國先?世界上只有一個意大利,梵蒂岡唔係講宗教,唔係講神愛世人,竟然變咗講民族主義,叫人去「愛國」?究竟香港搞緊邊科?究竟香港仲有咩學校係可以讀得?

因此香港人家下就係要維持呢種反智嘅狀態,可以去酒吧飲酒,去夜店叫雞叫鴨,去K房去浴室去泳池,但係就唔可以去投票。政府取消咁多限制,與原本嘅立法會選舉日期,只係相差12日,連半個月都冇,點解立法會唔可以選舉,要「最少推遲一年」,但係各行各業就可以復市呢?不要問,只要信,要信政府,然後因為你親身體驗咗,就會慣,就唔會因為被人強姦,而感到不安。

三權分立,法院判咗幾廿年就話有,政府而家改口就話冇;教育局局長楊潤雄話:「老師不論立場,都有責任帶動學生了解港區國安法」──有咩好教呢?教「黨即法律」,定係「黨大晒」?教小朋友要講大話?定係教學生要埋沒良心,總之「聽話」就得?啊,應該係教「被人強姦記得唔好反對」、「慢慢就會慣」、「然後你就唔會感到不安」,做個「中國香港人」,呢種諗法先係「真理」呀!

----------------------------

請即預購《噴火30年壹驚艷 性感女星典藏集》特刊,當年《壹週刊》鏡頭下的李嘉欣、黎姿、朱茵、舒淇、邱淑貞等三十位經典港姐、性感女星,一一復刻,艷壓全港。

自取優惠價 港幣$83【按此搶購】

包運費價 港幣$110【按此搶購】

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所