• 【林曉峰疫市繼續清閒】離婚康子妮撲水養兩子 轉做保險月餘榮升Top Sales
  • 2020-09-18    

 

43歲康子妮離婚前,為養家,已經百足咁多爪。依家同49歲林曉峰離咗婚,為生活、供樓、同埋養兩個仔,佢嘅瓣數有增無減,踩埋入保險業界,仲話咁快登上咗業績榜成為「Top Case Producer」,搵保單無難度。

多年前,林曉峰失去咗商台節目,令一家大細生活無以為繼,唯有漏夜搬屋賣車似足走佬。「見過鬼怕黑」,康子妮唔想再靠老公一個人搵錢,所以開始出返嚟做嘢。

直到武漢肺炎爆發令娛圈停擺,林曉峰冇乜工開,康子妮差不多成為家庭經濟支柱。康子妮近年係鄭伊健、容祖兒演唱會御用和音,可惜好多騷都延遲,又無得走埠登台,但佢勝在敢做敢試,試落仲發現自己周身刀張張利,所以唔只音樂範疇發展,如組織組合「ArmCharm」、推鋼琴專輯等等,音樂之外仲撈埋KOL、美容師同輔導員,甚至一條龍自己造首飾、賣首飾。
康子妮近年係鄭伊健、容祖兒演唱會御用和音。
可惜因疫情關係,很多騷都延遲,影響收入。
幸好她百足咁多爪,音樂以外的範疇也有涉獵。

離婚之後,康子妮畢竟仲要同林曉峰一齊養兩個仔,大仔林寶和細仔林熙現年分別十七和十六歲,仍然在學,負擔唔輕,而且近期疫情關係,林曉峰繼續「清閒」,收入唔穩定,所以康子妮離婚之後,並無因此變得輕鬆,反而更加要獨立,佢亦唔再綁手綁腳,踩埋入保險界搵食。

其實早喺八月份,康子妮已經出Post強調:「挑戰令生活更有趣,而戰勝挑戰更令人生倍添意義。」相中原來仲有類似「傑出從業員名單」之類嘅海報,即係起碼做咗一個月左右,佢IG自介都寫住「RISK & WEALTH MANAGEMENT MANAGER」,出埋公司名添。

短短一個月時間,康子妮已經榜上有名,榮登公司嘅「Top Case Producer」,唔簡單呀!

當然,佢不嬲都勁,喺音樂方面尤其突出。康子妮出生富裕家庭,父親係銀行家,喺加拿大讀書同成長,未夠16歲已經考獲鋼琴演奏級,未夠18歲已經升讀多倫多大學音樂系。只係無諗過音樂以外都可以話做就有成績,事實亦證明佢有本事喺各方各面做一個事業型女強人。
IG資訊列已寫上加盟的保險公司。
相中有類似「傑出從業員名單」之類的海報。
康與林曉峰結束18年婚姻,但早前長子生日,仍然齊整慶祝。

----------------------------

請即預購《噴火30年壹驚艷 性感女星典藏集》特刊,當年《壹週刊》鏡頭下的李嘉欣、黎姿、朱茵、舒淇、邱淑貞等三十位經典港姐、性感女星,一一復刻,艷壓全港。

自取優惠價 港幣$83【按此搶購】

包運費價 港幣$110【按此搶購】

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所