• 【中環人語】強悍雙姝 昔日港大風頭躉
  • 2020-09-14    

 

上週媒體出現兩個女人,引起九十年代港大女畢業生熱烈討論。第一位係代表差佬出來發言,交代擒拿十五名疑犯,因炒282股票贏到錢單案嗰位女總警司鍾詠敏(Eve),佢雖然戴上口罩,其粗豪說話語氣,佢昔日嘅室友單憑其聲綫已能「點相」,Madam Chung讀書時住喺港大St. John's 宿舍八樓,出名「寸嘴」甚至都幾「爛口」,所以室友聽到佢當日會見傳媒時的發言,指:「已經係好克制、好斯文啦!」讀書時Madam Chung經常代表St. John's宿生會對外比賽,Hockey,籃球、田徑樣樣皆精,正所謂唔打得都嚇得,尤其對兇狠嘅眼神,同佢落場對疊,簡直當你係殺父仇人咁㗎!德望中學出身,喺港大讀經濟系,仲上AIESEC莊,九五年畢業即加入皇家香港警察隊,平步青雲至女總警司,月薪$14-$16萬㗎。

《百勝女CEO 有魔鬼魚稱號》

講到搵錢,Madam Chung就唔及同期嘅師姐,剛上市嘅百勝中國(9987)CEO 屈翠容(Joey Wat),此女強人讀社會科學,當年能夠到北美大學作交換生只得一、兩名精英,Joey是其中之一,出生於福建嘅佢,好細個就嚟香港,就讀於聖士提反書院,90年代佢同好多讀政治、經濟嘅港大生一樣,對中國改革開放政策充滿憧憬,凡涉China的課程都見到佢蹤影,如Chinese Politics,Economic Development in China, Political Economy of China等等;她在加拿大UBC交流一年後返港,為課堂帶來不少衝擊,同學仔每次上tutorial都鑲晒鋼板預佢「鋤」,因為Joey會不留情面地以一口流俐英文去批判做presentation嘅同學,令討論氣氛十分熱烈,甚至情緒高漲!有時就連教授都未必滿足到佢嘅提問,加上佢嘅形象突出,「one-length」髮型後留了一條長至背脊,染上金色的髮尾,同學們都暱稱她為「魔鬼魚」。佢以一級榮譽畢業後,先後加入美資顧問公司A.T. Kearney及Mckinsey,後來在誠哥屈臣氏歐洲任要職近十年,2014年才加入百勝餐飲中國,2018年升任CEO,去年年薪達1200萬美元,所以真正考第一嘅女人,係有個「價」嘅。

----------------------------

守住新聞自由 和你撐計劃每月$300起撐《壹》仔

按此了解更多

壹呼百應 號召有心人 請香港人睇壹週刊

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所

-----------------------------

【《壹週刊》昔日紙本檔案庫】

30年壹仔經典 壹壹重現!