• 冰山崩了一角|刁佬
  • 2020-09-11    

  • 冰山崩了一角|刁佬

 

本週焦點重歸壹傳媒(282),個個都想知被捕的15人的背景,都是無業游民為主,好大機會是人頭。

雖然大部份無業,但他們絕不簡單,一早於爆炒壹傳媒前,已擁有做世界的必要條件同超級基建,包括高頻電腦程式交易、大量不同的股票戶口、投資散貨群組等,三軍未動,糧草、基建、網络已一應俱全,這亦正好解釋了炒作當天減持最多的是盈透證券(Interactive Brokers),因為盈透證券佣金便宜,介面及平台對很多電腦程式交易員來說很方便,外加軟件作電腦高頻交易是完美之合,也是很多專業投資者喜歡用的券商。

根據毒品調查科財富調查組的資料,他們犯案的方式是如下:先由低位開始作高頻率密集交易,每單掛盤買入十幾萬至幾百萬股壹傳媒,然後極短時間內同價沽售,以製造成交暢旺的假象。因為平時壹傳媒甚少成交,低流通量想炒都無胃口,自然要兜一兜熱個場。因為極短時間內同價沽售,他們有時甚至連賣出指令都未執行,就以相同價位再買入。壹傳媒作為一隻不能沽空份股票,未有股票在手,假如他們自己掛盤又自己買返,呢點絕對犯法。

假設他們初期為打成交,賺蝕都無所謂,打成交打到咁上下,低價囤積貨底,就真金白銀用錢以主動買盤暴力爆炒上去。當日肥佬黎被捕的新聞成為最好的宣傳,爆炒吸引傳媒報導,引散戶入局,他們便於高位散貨獲利。

這種手法市場常見,遠至微訊女,近至近期的偽名人WhatsApp群組,大家可能亦已有所聞,值得一看的是,拉完人後,壹傳媒股價又有異動,所拉的只是市場冰山一角。

這案例有趣的是(i)市場上炒鬼多的是,但無人希望每日刀口舔血,做完世界都會從良轉行,所以大部份落手落腳的炒鬼,都未賺到大錢,哪有能力擁有這麼完美的基建。(ii)有錢的炒鬼地位如基金經理,如果為錢去炒,可每日挑選一隻細價股重複以上手法,賺個盆滿缽滿,反正證監同執法人員官僚、人浮於事,無投訴都唔得閒理你。偏偏要炒隻最容易惹禍上身的壹傳媒,唔似只為求財的炒鬼所為。(ii)最後一點所有行家都知道,炒鬼用嘅人頭十之其九係國內同胞,平靚正又無限供應,點解要用香港人做頭?專業炒鬼最怕人拉,但仍以身犯險,又有咩人會對壹傳媒股價咁關心?

喺呢個金融世界,好多嘢都可以抺去,唯獨是銀行的資金流向無得抺去,究竟咩人提供資金畀呢班炒鬼做世界,順瓜摸藤必定找到答案。

專欄作家簡介:

刁佬

遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。

----------------------------

【亂世中 食大浪】獨家分享網上直播 | 羅家聰 - 財經評論家 | 立即了解更多