• 【禁忌之林】炒股變造市 駕駛好危險(林忌)
  • 2020-09-11    

 

家下在香港生活,真係做乜都好危險;揸車出門見有人衝出馬路,你響一下咹,又畀人話你危險駕駛;車上有修車用嘅士巴拿,就話你藏有攻擊性武器;在限速50公里度揸30公里,就話你超速。總之睇你唔順眼,就求其都要搵條罪去入你,正所謂莫須有,總梗有一條罪名喺左近。

吹到又危駕又藏有攻擊性武器,卻只係用「不小心駕駛」來告?代表乜嘢?仲記得當年聽師傅教落,告「老不」,絕對係萬能key,容乜易就話你不小心,易入到暈;有人咬定你睇佢唔到,就不小心;話你距離(其他人/嘢)太近,又不小心;話你冇留意路上行人,又係不小心;總之在繁忙嘅香港道路,每個司機都符合「不小心」嘅定義。

只要個官認為個證人「誠實可靠」、「高尚情操」、「盡忠職守」,即使證供前後有矛盾,但係──最重要呢個「但係」,事隔太耐啦,情況混亂啦、頭暈身㷫啦,男人M 到之類,總之都係「合情合理」。咁樣即使證詞點樣唔可信,點樣同其他證人口供唔脗合,又或者點樣同影片影出來係兩回事,明明應該係「疑點利益歸於被告」,唔知點解永遠變成「疑點利益歸於『驚察』」。

因此律師遇著呢類案件,呢一千幾百罰款,以至扣五分,好鍾意就咁叫你豪畀佢──認罪啦,打來都係得個吉呀!你上庭冇得返工,仲煩呀!家下你都明知咩人係最惡,律政司又點樣同佢哋「合作無間」,你想尋求公義?在2020年今日嘅香港?你諗你啦!

至於成班友仔在WhatsApp交換炒股資訊?嘩,你「造市」呀?買下股票都隨時變被毒品調查科拘捕,明明只係高位散貨掟貨,就吹到你變高位「沽空」──唔好意思,毒品調查科平時唔炒股,所以唔知咩叫沽空,所以港交所列明壹傳媒不可沽空,警察都可以公然作失實聲明,老屈被捕人士「沽空」,唔識就嚇死你,識就笑死你。

記招睇住個警察,每句金句都忍唔住:「被捕人士…買賣有導向性,一齊買入沽出,一步一步令股價上升」──冇嘢呀?你買股票唔係想佢升,唔通想佢跌咩?個重點係如何串謀,如何「造市」呀;你 show hand 瞓身買股票,希望佢升有咩問題?唔通我買咗想佢跌呀?講出來都笑死人。

後面嗰句更加係忍唔住笑:「囤積一定數量的低價股份後,再利用社交媒體言論吸引散戶入局,於高位散貨獲利,股價隨即暴跌」──咦?唔係低買高賣,唔通高買低賣呀?有咩大戶唔係低買高賣?股票市場有邊個唔想「高位散貨」?原來買股票賺錢係罪?原來買股票應該蝕?

錯!賺錢當然唔係罪,大戶操控股價都唔係罪,中資股做乜都唔係罪,但係你哋買壹傳媒,落警察面,就梗係大罪啦,明冇?當日咁大件事,證監會一粒聲唔出,唔停牌,係咪失職?啊,梗係要搵人告下來祭旗,求其都要搵啲嘢出下氣先係啊!

壹傳媒股票價嗰兩日,最高上升25倍,點解呢?係因為幾條友自己造市,定係原來係因為警察濫捕而「造市」?大家心中有數。歸根究底,明明多數人入市都係為咗表態撐壹仔,都可以吹到成件事係有人「造市」而成;未落案的初步調查,連法律意見都未問就開記招,今日嘅香港,就係已經變到咁荒謬。

----------------------------

守住新聞自由 和你撐計劃每月$300起撐《壹》仔

按此了解更多

壹呼百應 號召有心人 請香港人睇壹週刊

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所

-----------------------------

【《壹週刊》昔日紙本檔案庫】

30年壹仔經典 壹壹重現!