• 【嬲到離開大台】64歲吳浣儀:後生時喜愛夜蒲又曳又惡死
  • 2020-09-08    

 

19歲已經入行拍劇,現在64歲的吳浣儀,日前接受苑瓊丹節目訪問,大談當年如何嬲嬲地離開大台!

戀愛大過天

「年青時有人讚我幾靚,加上讀書時有做過舞台劇,覺得自己鍾意做戲,見到電視賣廣告,又冇咩做咪試吓考訓練班,諗住唔得㗎,點知又過晒關。」就是這樣,吳浣儀入了行。

入行初期,她常演閒角扮茶客,兩個月後便接拍有份量的角色,迅速走紅,她說:「因為我以前又曳又惡死,所以角色都叫做番我自己,好自然就發揮到囉。去到1975年我因為『嬲』而離開電視台。當年都算年輕,做咗兩年突然搵你做啲閒角,拍極都係閒角,由朝等到晚都未埋位,阻住我拍拖嘛,我又剛開始拍拖。加上唔小心NG就會有說話聽,咁咪唔鬼做囉!總之都係任性啦,做嘢冇諗過後果,跟住就轉咗去佳視,點知最後執埋,咁我咪走去結婚囉。」

原來,年輕時的吳浣儀這麼火爆,她更大爆自己舊時喜愛夜蒲:「話我嗰樣老老實實,係唔了解後生嘅我。當年我都係會周圍玩,收工要去『蒲』㗎,去飲嘢、跳舞之類,跳得好勁添,我係鍾意去玩!」她更即席示範舞姿。
吳浣儀應苑瓊丹之邀接受訪問。

一人養大四兒女

結婚後,直到丈夫患病,吳浣儀一邊照顧家人,一邊拍劇養家,是她人生最艱辛的日子:「當時真係唔做唔得,仲要問鮑姐、羅蘭姐借錢過難關,要拍劇還債!不過我好得意,自身嘅事唔會點喊,要面對囉!後來丈夫過身,好在一直都有戲拍可以養家,當時好忙都冇時間理啲子女,但好在佢哋依家都好OK!」三女一子均港大畢業,從事社工、飛機師及獸醫等行業。

最近,吳浣儀也因武漢肺炎疫情而閉關,但仍期待好劇本降臨:「依家有戲拍咪拍囉,不過我係冇攞獎命㗎,當年恨過吓想攞,依家依然想,但呢啲都係整定,最緊要開開心心、身體健康,睇開啲唔好轉牛角尖囉。」
吳浣儀坦言年輕時喜愛夜蒲,更即席起舞。

----------------------------

守住新聞自由和你撐計劃每月$300起撐《壹》仔

按此了解更多

壹呼百應號召有心人請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典壹壹重現!