• 【禁忌之林】中國嗌交部嘅偉大成就(林忌)

  • 發布日期:2020-09-05 11:45
  • 【禁忌之林】中國嗌交部嘅偉大成就(林忌)

 

「我明明咁好,又熱愛和平,又高大威猛,點解冇人鍾意我呀?」

「你日日講大話,四圍蝦蝦霸霸,一面對人喊打喊殺,一面話人哋唔鍾意你?你冇嘢呀?」

最近睇新聞報導,就會發現某個毒男類物體,日日喺度叫春:「點解冇人鍾意我?」一時聽華大媽大叫:「美國有反華妄想症」,一時就恐嚇人哋要宣戰,要用導彈擊落人哋嘅船艦;最奇妙嘅係,日日鬧人哋點解唔驚佢,到美國一再發表報告,話中國威脅嚴重時,又話人哋老屈佢,吹到自己係和平小天使咁款。

咩中國嗌交部長部長羅照輝,大鬧「美國已成南海和平嘅最大威脅者」──成個南海其他國家都撐美國自由航行,係得中國反對,咁究竟邊個係和平最大威脅者呢?邊個國家想射四枝導彈(雖然兩枝射失,一枝射落廣西)?

睇返呢兩年中國嗌交部嘅成就,簡直就係能人所不能,四面樹敵八面威風,幾乎把所有發達國家盟友得罪晒;原本貿易戰對手只有美國,成個歐洲都唔妥 Donald Trump,加拿大杜魯多更長期同 Trump面左左,澳洲原本親中親到不得了,英國就腳弱咗冇十年都八載,年年幫中共兜話香港「一國兩制運作良好」;由希臘、意大利到捷克,更應承要參加中國嘅一帶一路;德國、法國為咗生意,對中國人權問題得把口,除咗「對話」與接受流亡者,基本上係冇任何實際嘅行動。

結果中共在短短兩年之間,成功爭取趕晒去對家,加拿大因為孟晚舟日日被中共嚇,澳洲就因為話查武肺又被中共嚇,更唔使講「港版國安法」違反《中英聯合聲明》,一鋪清袋令英國強硬起來,寧收300萬香港人,都唔再卑躬屈膝。加埋只係為出個聲明都被中國嗌交部追殺嘅紐西蘭,原本主要只係交換情報嘅美英加澳紐五眼聯盟,突然「敗部復活」,連日本都話要加盟。

英語系國家大團結,不但係中共太子黨,成班親屬嘅聚居地,更係連留學生都冇地方可以去。中共不斷叫制裁澳洲,澳洲就變與美國共同進退;為左華為太子女日日鬧加拿大,於是加拿大就由腳軟變企硬,令美國幫加拿大出頭。兩年前人人笑嘅親中國家,都變埋「反中」,能力所不能呀!

英語系衰晒,好啦,搵歐洲佬啦!歐盟27國,上面都講左幾個入左一帶一路,加埋「老朋友」以前叫南斯拉夫嘅塞爾維亞,仲有呢幾年不斷搞獨裁嘅匈牙利,諗住冇死喇卦?結果希臘嘅「激進左翼聯盟」政府,賣完港口搞大選就倒咗台,好彩人哋真係好窮,新上任嘅政府都仍然乞緊人民幣,算係保住邦交;匈牙利就被佢呃左去簽不能公開嘅十年密約,起條冇人用嘅「匈塞鐵路」,兩個落後國家起鐵路互駁唔知為乜,就當係幫中資搵食啦。

之但係其他幾個國家,意大利嘅反對黨領袖、前副首相就話要送中國去「紐倫堡」,去審訊中國在武肺對全球人民嘅傷害,電訊公司TIM就話禁華為;多年親中嘅捷克總統澤曼,年初就發火話中國走數,簽咗合約冇錢到,搞活動咪預佢,加埋參議院議長帶領訪問台灣,激到中國外長王毅大聲恐嚇話有「嚴重後果」,於是激嬲埋德國、法國外長,甚至鄰國斯洛伐克總統都開聲撐捷克。

俗語話「阿崩叫狗,愈叫愈走」;中共呢兩年最偉大嘅外交成就,係促成原本唔妥嘅全球民主各國,達成一致共識,就係要聯手對抗中國;美國更先後與捷克、愛沙尼亞、波蘭再加埋斯洛文尼亞,簽「5G安全聯合聲明」,去杯葛中國嘅華為,原本仲有好多國家喺度望;事實上捷克買中國貨,遠多過中國買捷克貨,連捷克都畀中共咁兇,咁其他賺中國錢嘅國家,仲可以唔驚,任由個網絡基建被中共控制咩?

咪當人傻仔啦….

----------------------------

守住新聞自由 和你撐計劃每月$300起撐《壹》仔

按此了解更多

壹呼百應 號召有心人 請香港人睇壹週刊

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所

-----------------------------

【《壹週刊》昔日紙本檔案庫】

30年壹仔經典 壹壹重現!