• 垃圾也馨香|刁佬
  • 2020-09-04    

 

有年輕朋友問點解有一啲上市公司七勞八傷,竟然都有老闆科真金白銀買,係咪因為有靚女做中介?抑或佣金豐厚,重賞之下必有勇夫?刁佬最近處理嘅一單刁,靚女就無啦,資深中女就有一堆。

作為日常顧客角度,我哋當然想貨品平靚正、性價比高,包裝少少崩都要換。大老闆身邊咁多近身待衛、武林高手,你睇到間上市公司係垃圾,佢哋一樣睇到。但係呢個世界百貨應百客,既然係垃圾,價錢當然平啲,條件又吸引啲。正如凌凌漆話:就算一張廁紙、一條底褲,都有佢本身嘅用處,大拿拿成間上市公司又點會冇用呢? 不過要摘葉飛花都可成為武器,當然只有絕世高手先得啦。

以刁佬行走缸湖多年嘅心得,點解垃圾殼都有人要?垃圾殼吸引嘅條款主要為以下兩點:

1.分期付款

好似買樓供樓咁,有錢嘅當然可以一炮過買,無錢都唔緊要,放低個首期。分期付款嘅好處就係可以畀啲掹車邊嘅準殼主成為殼主,呢點對很多財力不足的買家來說十分吸引。

在一單買賣殼刁中,刁佬極之唔贊成分期付款,因為殼價的浮動很主導單刁嘅成敗。當買賣進行到一半時,殼價升,原殼主唔想賣,殼價跌,準買家又想褪軚,仲會出現好多交收上嘅細節問題,最後導致出現股東爭拗、打交、訴訟比比皆是。

不過好多買家一直沉醉於香港市場嘅效率,以為可以邊買、邊炒、邊出貨;呢一種電視劇橋段不是沒有只是稀有,一將功成萬骨枯,如果咁易,刁佬自已都買隻殼做主席啦。不過橋唔怕舊,每年都一樣有不少追夢者葬身股海。

2.國內收錢

大部份來香港買殼的都是國內老闆,要搬人民幣出來,數目唔係淘完寶搵個朋友搭膊頭或者羅湖螞蟻搬家咁簡單。講到2至3億的數目,更要有餘糧為殼内的現金及資產交收,對每一個內地老闆面言都係一個困難而且成本不菲的要求。

如果殼主可以做到國內收錢,對唔少國內老闆來講是有極大吸引力。因為不單可以省下成本,在另一個角度而言,新買家亦同時將國內貨金安全份停泊在香港股票市場之中,隻殼可以在國内做世界,做完世界資金留在香港自由出入,何樂而不為。

仲有一樣嘢,垃圾公司會吸引買家就係因為其自身的問題,喺一些特定的場境中,上市公司的問題會是一個非常有用嘅資產。大家可能會話唔係呀嘛,問題都係資產?事關內地好多大白象工程、小金庫問題,一間垃圾公司嘅虧損及債務正好可完美解釋呢啲黑洞,將問題掩藏。正所謂食光輸乾,身體健康。

刁界好多光怪離奇嘅事,學海無涯,刁佬日日都要更新自己,唔係就無得撈。

專欄作家簡介:

刁佬

遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。

----------------------------

【亂世中 食大浪】獨家分享網上直播 | 羅家聰 - 財經評論家 | 立即了解更多