• 【禁忌之林】7.21被打變被告 香港好危險(林忌)
  • 2020-08-28    

 

荒謬政府警告市民,呼籲危害安全──香港係一個非常危險嘅城市,坐車返屋企會被人打,打完仲隨時會被人控告「暴動罪」。

試幻想下,就好似電視直播見到嘅片段,7.21當晚你坐西鐵返屋企,一開車門,一班白衣暴徒衝入車,見人就打;被人打完一身,你落車,被一班白衣人圍住;你打999報警,警察唔理你之餘,事後就話「你班友」打左兩萬幾個999「玩電話」,隨時屈你「浪費警力」;你被人打,唔敢行開,你就隨時被人告「非法集結」;你被人打到一身血,你嘅血液以及抹血嘅紙巾,隨時被人控告亂拋垃圾;當中同你企埋一齊嘅任何一個人,走去用雨遮或者水樽還拖,你就隨時被人控告暴動,然後事後仲要話你被人打一身,係「勢均力敵」,甚至老屈係你主動去「撩交打」。

黑警與白衫人拍晒膊頭,傳媒影到警察放人走;兩個警察掉頭離開,警署落閘唔救市民,警察公信力跌到最低點嘅 7.21 事件,有班友仲嫌件事唔夠臭,仲要在最痛嘅傷口灑鹽──唔夠痛?再痛啲好冇?唔夠臭?仲要再臭啲?呢個就係特區政府嘅「新常態」,要透過竄改歷史,指鹿為馬,以謊言來「管治」,拍落有個接受中國山雞台訪問嘅特首,聲稱自己「唔識政治,只識管治」──唔怪得連搞限聚令禁堂食,連原來有好多人要在戶外返工都唔知啦!唔係特首嘅問題,一定係香港人嘅問題。

香港人心散晒,得返班深藍相信政府;個原因就好講簡單,小朋友都識嘅原理──狼來了;你個政府日日帶頭講大話,持續日日都呃人,然後即使唔係呃,都唔會再有人信;好自然政府做每一件事,都會被大家用放大鏡審視;好似咩「全民檢測」,除左班深藍之外,有幾多人會自願去做?

連平日撐政府,成日鬧黃絲搞亂香港果班,聽到要去驗毒都個個擰晒頭,口說愛國,身體最誠實,冇著數要人去驗?係咪講緊笑?早排有民調透露,連班藍絲都有一半,不滿政府防疫嘅表現;基本盤都冇埋,好多以前相信「和平穩定」,見到家下個局面,唔係自己親身移民,就係奉勸自己子女移民;97前留低嘅,好多仲相信香港經濟會繼續好景;2020年?唔好講香港,連中國經濟個前景都悲觀了,餘下只係惰性,或者口講走唔到,真相係好X鍾意香港咋。

前早黑警與山雞台,拍左套乜嘢「暗夜星辰」,片中有個警察問:「你哋真係咁憎我哋?」成班藍絲 KOL 專頁仲不斷拎來宣傳;點解憎黑警?望下警察在 7.21 做左乜嘢,然後仲要繼續死不認錯,繼續不負責任,甚至家下直頭竄改歷史?

一班與黑社會拍膊頭,縱容佢哋見人就打,事後唔單止包庇,仲要告埋去幫手嘅議員,充份顯示左警黑勾結,再惡人先告狀嘅醜態;不妨而家再播下呢段宣傳片,睇下絕大多數市民會點答?

黑警提醒我哋──7.21,就係永遠不能遺忘嘅傷口;7.21,就係證明了香港警察係完全失格嘅賣港走狗;7.21,唔止係唔見人,係包庇打人,係反咬一口告返你轉頭,正係迫害港人嘅最大毒瘤。

----------------------------

守住新聞自由 和你撐計劃每月$300起撐《壹》仔

按此了解更多

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!