• 【Son話教育】過氣獵頭説獵頭(張慧敏)
  • 2020-08-25    

 

最近有一位所謂獵頭,因為唔妥 Candidate 的行為及態度,公開了二人之間的 WhatsApp 對話。有免費花生食,個個食得不亦樂乎,不過意見分歧,有的認為 Candidate 出言不遜、態度奇差攞嚟賤抵死;亦有人認為,Headhunter 冇道德,指不應該公開雙方私底下的談話內容。作為職場女王,雖然過氣,但好歹曾經是紅牌獵頭人,不少朋友急不及待 forward 給我問意見。究竟誰是誰非?既然大家想知,我就一次過解答,送佛送到西,贈多幾句解説一下何謂獵頭。

先解答事件,Candidate 態度幾差幾過分都好,可以直斥其非亦可以鏟到佢上天,但基於專業守則及原則,無論如何都不能公開,亦不能對其他人提及此事。所以,即使這位獵頭有幾啱,而嗰位 Candidate 點樣錯, 獵頭 Cap 圖公開談話內容,觸犯天條無可恕,完!

想當年,我比今日火爆何止10倍?有 Candidate 約三次面試都臨時甩底,一而再﹐再而三玩起我,還有對方 HR 阿頭、老細及老細的大秘書…我鏟佢何須擇日子?不過,私底下幾激氣點樣鬧都好,我都不會向其他人提及或唱衰佢,因為牽涉的,是專業獵頭人的 Professionalism,是行業的 Cardinal rule!

今時今日,個個都話自己係獵頭,唔通個個都係獵頭咩?講多無謂 ,只會做年薪超過百萬的 Deal、招聘三兩萬人工的職位,就四周圍宣揚自己是獵頭的,真係唔好意思,我笑咗!真正的 Headhunt,顧名思義,係睇住人哋個頭來獵,手頭上已經有 Concrete的職位空缺,絕對不會無的放矢。作為專業的獵頭, 行頭內必然有份量,角色人物的來龍去脈及背景,心中全部掌 握。想當年,我以例不虛發、快狠準見稱,通常一擊即中,最快紀錄是在一個月內 Close 了一個年薪超過三百萬的 Deal。 在LinkedIn 撈 Candidate 的,極其量只能是 Headhunting Firm 的 Research 同事,怎可能 Headhunter 親自出馬打電話?仲要唔使約見,講幾句電話就得?

不過的而且確,把自己的所有工作經驗,包括 Salary history 公開放在 LinkedIn 任人睇,司馬昭之心路人皆見,擺到明想搵工、搵機會。這做法冇話啱唔啱,但是蠢!剝光豬任人睇,就是連自己的賣點是甚麼都不知道的最佳證明。識得用,其實真係有用,有IT人只把系統語言、專長三言兩語簡介放出來,真的很誇張,半個鐘頭之內收到幾個 message 邀請約見。

當年我決定金盆洗手,曾經引起美麗的誤會。有人以為是我搵夠唔使做退休,其實是意興闌珊心力交瘁之下做的決定。根本唔同 Level,即使肯屈就,都不會有所成就,徒自貶身價!

撰文:張慧敏

張慧敏 (Alison),人稱 Son姐,從「獵頭女王」成功轉型成為商企顧問公司CEO,由始至終的專業是憑一對慧眼看盡職場大小疑難雜症。正職是一對兒女的母親,從自身挫折和經驗悟出教養之道,不外乎以身作則。

個人Facebook 專頁

----------------------------

守住新聞自由 和你撐計劃每月$300起撐《壹》仔

按此了解更多

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!