• 【禁忌之林】柒婆教落:我飛你咋!(林忌)
  • 2020-08-21    

 

俗語有云,跌落地都要揦返拃沙,林鄭月娥呢排做乜?大家心中有數。劍橋大學寫封信要收返個名譽院士?柒婆立即主動退咗佢。其實林鄭應該霸氣啲,學葛珮帆拎「夏威夷格林威活大學」嘅博士學位,又或者何君堯被褫奪ARU嘅名譽博士學位咁;話說英國有劍橋大學,香港都有劍橋護老院,柒婆其實大條道理,成為香港劍橋嘅名譽院士。大家都是名譽院士,不要分那麼細!

畀人制裁封銀行戶口再Cut信用卡?哎呀「少少唔方便,冇咩大意義」,獲得共產黨信任,自稱十分光榮呀!柒婆不妨反過來 spin:「哈哈哈,其實傳媒都報導過,話我唔識用八達通,所以其實信用卡我都唔係太識用,其實我想 cut 卡好耐!」嗱,咁咪符合主動退院士嘅做法,每次都話畀大家知:「係我飛佢,唔係佢飛我!」

咪以為林鄭月娥純粹係要面,其實佢只係模仿緊中國外交部嘅對白與作風,證明佢已成為了優秀「黨的人」咋!你睇?近日美英等五眼聯盟,加埋德、法等國家,紛紛取消香港嘅引渡協議,每次中國外交部都立即跟進,即在當日開記招,宣告自行終止引渡安排──咦?又係「我飛你先」呢招呀?死撐又有咩用?你唔好理,家下做港共官員,乜都唔使識,就係要精於擘大眼講大話。

上年林鄭月娥扮晒蟹,對住鏡頭高呼唔想香港成為「逃犯天堂」;講到唔修逃犯條例,就會影響香港治安;咁而家點呢?陳同佳唔使理了?家下被咁多國家取消引渡協議,都仲可以唔要面到發表聲明,自稱「香港仍然具備完備嘅司法互助和移交逃犯合作機會」──咦?完備?唔係話有漏洞咩?唔係話之前唔修例香港就好危險咩?唔係話不能引渡,成為逃犯天堂,就嚴重影響香港治安咩?被咁多國家取消了引渡協議,今日反而「完備」拿?究竟一個政府要有幾無恥,先可以日日咁講大話?

睇埋行政會議成員湯家驊發音,更奇驚為天人!湯JAVA對記者講,話早幾年香港已經對美國嘅監獄制度「失去信心」,因此實際上已經停止向美國移交逃犯幾年──即係原來係香港飛美國先?咦?林鄭政府唔會仲譴責美國「違約」,出新聞稿話「批評美國不尊重雙邊協議,應受國際社會譴責」咩?原來係香港主動違約在先,咁你而家怪咩人哋取消你呢?究竟係你取消人,定係人取消你?兩邊龍門射晒,個龍門就來畀你哋搬爛啦!

話取消選舉係因為疫情,死撐無關政治;家下疫情減弱了,政府可以下星期恢復辦公了,又話最快九月中,就可以放寬社交距離了──原來大家可以近距離接觸,但就唔可以隔住個口罩投票;小朋友可以開學,只要疫情減弱就隨時可以復課,可以返去食茶點玩口水,但係成年人就唔可以投票,選舉就最少要停一年;成個政府講完一個又一個大話,私相授受畀中國公司做所謂「全民檢測」,昆老人家以為驗左一次安全,就好似打左疫苗咁,然後就唔會中;口說代驗結果會銷毀,不會「送中」,事實就係完全沒有法例監管。

即使「有法」又如何?你睇下許智峯以私人刑事傳票,控告西灣河開槍警,以至深水埗撞人的士司機?明明咁難檢控都得到裁判官受理,律政司都可以隨便就「接管」然後立即撤控,已經完全唔理儀態同外界觀感,完全搲爛塊面。

人不要臉天下無敵,肯信林鄭注定仆直。

----------------------------

守住新聞自由 和你撐計劃每月$300起撐《壹》仔

按此了解更多

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!