• 【4月自稱中武肺】吳剛拖欠Eason個唱門票三萬多元退款 受害人孫生:以為佢係名人唔會呃錢
  • 2020-08-15    

 

破產繼續要風光

64歲的吳剛,留給觀眾的經典印象,莫過於永在籌款騷赤膊表演食炭飲滾油的招式。不過到90年代尾,形象騎呢的他淡出娛圈,轉型做飲食生意,及當上「藍店」富臨宴會部總監,身兼埋婚宴司儀。之後屢傳財困,12年因合約糾紛,被頒佈破產令,原在16年回復「自由身」,但被發現其破產令被延至去年7月。

儘管破產,但吳剛堅持人靠衣裝,表面風光!去年本刊兩度發現他偕老婆及兒子一家三口出動,均以浮誇又華麗衣著行街,住的也要揀豪宅君臨天下。但偏偏三萬多元的陳奕迅演唱會門票錢,就拖欠半年不退還,最後要追款人孫先生報警求助。

吳剛食炭,成為形象標記。
去年初本刊發現,仍有破產令在身的吳剛,與老婆及兒子齊齊以浮誇打扮出動,華麗衣裝十足做騷。
人靠衣裝,一家三口繼續華麗出巡。

代訂餅卡演唱會飛

讀者孫生稱,去年在朋友介紹下,認識可幫他以七折購餅卡的吳剛,交收時吳剛又主動問他,有冇興趣訂購12月舉行的《陳奕迅Fear and Dreams香港演唱會19/20》門票。於是孫生結集十二位朋友,共34張門票,每張980元,合共33,320元,交由吳剛訂購。

不過由代訂餅卡到演唱會門票,吳剛都要求現金交易,不經銀行過數。孫生說:「佢話要現金交易,咁大舊錢要現金畀,起初都覺得奇怪,不過聽聞佢已經破產,覺得可能同銀行戶口有啲關係,所以無再仔細追問。之前搵佢買餅卡,佢都遲咗一段時間先至畀到我,不過最後都有畀足。陳奕迅演唱會前,佢都有撩我訂張敬軒演唱會飛,不過我話冇興趣。」
去年中孫生在朋友介紹下,認識吳剛買七折餅卡,有過餅卡交易得到信任,之後吳剛主動撩孫生,稱可代訂陳奕迅個唱門票,孫生沒料這次成為他的惡夢。
當日吳剛收下為孫生訂購共34張陳奕迅個唱門票,涉及金額共三萬多元,之後吳剛開出收據。孫生回想,吳剛只收現金,不肯經銀行過帳,事有蹺蹊。

自稱利息補償拖欠

去年底因疫情影響,陳奕迅演唱會主辦單位宣布取消,並安排退款,會於今年四月前完成處理,吳剛亦向孫生轉述官方退款公告,指四月先可以退錢。

不過孫生見其他朋友已陸續於年初收到官方退款,他則由1月追到5月,吳剛仍不退還款項。「期間都有追佢,不過每個月佢都不斷拖延。」

今年4月,自知不能再用官方做檔箭牌,吳剛便搬出其他藉口,將退款期一改再改,繼續拖字訣。

其中4月自稱中武肺,他給孫生whatsapp留言:「你好!孫兄,這兩天肚瀉氣,全身乏力,檢測呈陽性。下周三才可離開回港入數給你,萬分抱歉敬請原諒,見面再補上$5000給你致歉。」
四月仍未退還三萬多元門票錢給孫生的吳剛,自爆中招患武肺,以病為由繼續拖數,又說會加$5000利息作補償。但孫生話收唔到錢,你話畀一百萬都無用。
他自稱中武肺,入住深圳醫院。不過之後吳太跟孫生稱,丈夫入院做淋巴手術。
吳剛的拖字訣。
因疫情影響,陳奕迅個唱去年底宣布取消,官方亦在四月前完成門票退款。

扮誠懇

五月,吳剛繼續一副「誠懇」態度拖數,留言:「孫兄,萬分抱歉……小弟因為在大陸耽誤你的時間,萬分抱歉內疚。這幾天因為身體欠佳要接受治療,下周三才能回港入數給你……」,之後被再三追數,吳剛就send一張在病床相給他。

循環再用的「下周回水」,孫生開始感到門票錢凍過水。「已經拖咗好多次,所以唔再相信佢。問佢身處地方,希望去搵佢,但佢都拒絕。我話依家你一蚊都唔無還,就算話俾一百萬我都無意思,我都唔係想要你嘅利息,只希望佢可以俾番退款我。」孫生說。
每次吳剛都以一副「誠懇」態度話會還錢,但最後都係無影,拖數好有技倆!

吳剛老婆代出面

之後吳剛由拖變「潛水」,派另一檔箭牌,一位自稱是律師的人與孫生聯絡。「佢喺五月時搵咗一位律師朋友聯絡我,然後同佢律師傾咗一段時間,但都無咩作用,因為都唔係代表佢還錢,純粹只係一位相識嘅朋友。後來我繼續搵佢,但佢開始唔聽電話。有一日有位女子打電話畀我,自稱係佢太太,叫我唔好再騷擾吳剛師傅,有咩問題就搵佢追討。」

不過自稱吳太的女人跟吳剛一樣,不斷放飛機。一時指自己身在外地未能返港處理,一時留言稱:「我在吉隆坡,明天開車回新加坡,昨天我秘書已經滙了,銀行告訴他二個工作日。」不過最後當然如孫生講:「我查過戶口並無紀錄,再搵番佢嘅時候,佢就話秘書搞錯咗,所以要再過數。之後再搵佢,有時又話出咗海,有時又話喺西貢,無耐又話返咗馬來西亞,一時又話喺內地。」
吳剛交畀老婆應付後,吳妻同樣施以拖字訣,唔係放飛機,就係自稱已滙錢過數給孫生,之後他查戶口經紀,當然又係得個吉。
孫生查過戶口,發現又被吳妻老點!
除經典表演食炭、飲滾油,他還試過面劈磚頭。

兩公婆各有版本

吳剛自稱患武肺,留醫深圳醫院,但他太太對追款人孫生,卻說另一版本,孫生:「佢太太有講過吳剛師傅要做手術,好似係淋巴手術,同吳剛所講嘅有啲出入。」

老婆拖數兼發爛

拖數唔還,吳剛老婆還要發爛,惡人先告狀!六月時她給孫生文字回覆:「其實為這件事,我批評我先生下次不要多管閑(閒)事,幫了別人人家不會感恩,反而結怨……和你打交道,感覺你是有修養的人,所以才會答應你,以後不管誰開,只能4張。」
吳剛拖欠人家錢,代夫出頭的吳太還理直氣壯稱丈夫多管閒事才惹麻煩。能成夫婦,果然物以類聚!
形象騎呢的吳剛,昔日常常厚妝見人。當日淡出娛圈,一度進軍飲食界。

受害人報警求助

到六月,孫生為向購票的朋友交代,索性將吳剛太太加入whatsapp群組,方便其他朋友向她追數,但吳妻無歉意不特止,還鬧人垃圾,孫生說:「佢仲有話自己無欠我哋錢,仲話出律師信畀我,叫我唔好再搵佢。」未幾她索性電話封鎖孫生。吳剛夫婦拖數失蹤兼失聯,冇計可施下,孫生在七月到紅磡警署報警,並以民事起訴追討。
吳剛潛水,代夫出頭的吳太亦在七月時手機封鎖孫生,令孫生無法追討下,唯有報警求助。
吳妻自知一拖再拖理虧,叫追款人孫生不要生氣。但之後反轉豬肚發爛。
追數半年,受害人孫生忍無可忍。
「放飛機」留言多的是。

以為藝人有信譽保證

孫生起初以為藝人有信譽,點知都上當。「首先佢都算係名人,見佢說話亦好禮貌,諗住應該唔會呃錢。當時諗就算買唔到飛,都應該會退錢。決定將呢件事公開,係唔希望之後再有人中招。」

直頭八月初,孫生又多次致電吳剛,他終在whatsapp「蒲頭」,又再一次向孫生開出「空頭支票」,稱會在本月9日返港過數,但最後當然依舊無晒影。

本刊嘗試聯絡吳剛,他沒有接聽,其實近年吳剛不停轉電話,亦常身在內地。他的破產令被延長至去年7月,被延長的原由可包括破產人不合作、行為操守並不令人滿意,或未能擬備收入及取得財產的周年報告等。似乎愛食炭的吳剛,更愛食言,誠信亦跟他財務一樣,破產!
潛水兩個月,吳剛在孫生奪命追魂call下,八月初才再「蒲頭」以whatsapp回覆,他再次聲稱於 (8月9日)過數給孫生,但最後當然又係放N次飛機。
做酒樓宴會部總監時,圈中人監製梅小青夫婦,及梅小惠前來撐場。

----------------------------

ChannelNEXT人民學堂:識法大講堂

曾志豪X劉偉聰 同你拆解「港版国安法」

立即收看

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!