• 壹傳媒股價沙盤推演|刁佬
  • 2020-08-14    

 

本週之星必數肥佬黎莫屬,雖然本月未完,但肥佬黎極有可能挑戰恒馳汽車榮膺埋本月之星。除咗黎老闆因為國安法被拉咗之外,本欄是財經專欄,一切有關財經嘅大小事都會引起刁佬興趣。兩日間壹傳媒(282)股價升咗十幾倍,力壓剛達十倍股的美蘭空港(357),成為今年港股升幅榜冠軍。

不過剎那光輝,終不永恒,截至截稿前,壹傳媒股價由高位跌咗8成,但仍較最低價升4倍。有朋友必然好奇,是什麼成就短時間的股王?莫非KOL們及蘋果一眾粉絲,就是點金勝手?

壹傳媒身處夕陽行業,平日股票少人問津完全合情合理。在今個星期前,平日壹傳媒的流通量很低,過去三個月最高成交額的日子也只得數百萬元。十億元級別的庄家若以此股做庄,都不太容易散貨。

壹傳媒在星期二(11/8)成交額達42.65億元,市值升至29億,成為今天成交量第三高的港股,只是屈居於大家都好愛嘅騰訊(700)及美團點評(3690)之後。公司股價突然價量齊升?唔通公司有新發展?否則大家點會突然投資壹傳媒?講出嚟都匪夷所思。另一個原因,就是有炒鬼在背後,平日大家見嘅細價股正是這種操作。

刁佬在此做個沙盤推演,當日刁佬開市睇到壹傳媒股價於7仙左右,無乜成交午市後很多朋友打來,刁佬打開機睇發現成交同股價都放大。

大股東黎智英持有壹傳媒約71%股權,29%的股票在街外流通,約為8億股,請記得這是假設股票全是街外人,大股東沒有友好持有。那麼星期二那天的40.86億股成交,等於街外流通的股份轉手了近5次,如果係投資者,要賣同時有人買達5次以上,仲要係低位買上去,即是這堆Day Trader對股價極有信心。就算做庄,一日交收5次都幾辛苦,42億元成交額,打印花稅都要400萬。

按以上推論,刁佬只想到四個字:枱面交收。股票有價又有流通性,又係現金等價物,是一個非常好的交收工具,在市場上買賣,就可輕易地轉移資金。炒高隻股票然後交收,市場上沽,市場上買,完全是市場行為,光明磊落地將一大筆資金完美轉移。聰明嘅讀者可能會問,咁賣咗嘅股票點算?咪殺返倉落嚟再收過。錢又多咗,貨又收返。好多庄家都係用呢種方法。

不過散貨散到幾十億又轉手5次,我諗唔係國家級人物或資金雄厚之輩,實在唔可能。

順帶一提,關注市場的朋友指出買盤中以中外券行均有參與,其實刁佬想分享高手的地域操作守則。如果有外國人在外國參與香港的市場活動,若該等話動受到證監會調查,外國人身在外地不受香港法例管轄,證監會只可友善的邀請協助調查,所以外國人如果太忙又或者擔心肺炎未能到香港,証監會只可向其券行埋手。其實可動用數以億計資金去炒股票,點會慳律師費。

專欄作家簡介:

刁佬

遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。

----------------------------

【第四季砌出一個增長15%的「組合」】壹齊分享網上直播

譚朗蔚Stevan x 黃偉豪Ravi | 立即了解更多

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!