• 【禁忌之林】港獨邱騰華 反對Hong Kong is China(林忌)
  • 2020-08-14    

 

「美國政府要求香港製造產品,要用中國製造嘅標籤,呢個做法,大家都好清楚啦,呢個係指白為黑,與事實不符…」你冇聽錯嘛?指白為黑都講得出?即係香港製係白,中國製係黑?由黑心食物到各類黑心商品,全世界都出晒名嘅國家,大家都心知肚明,把白色嘅港貨,講成黑色嘅中國貨,又真係冇陰功呀!但居然由特區政府嘅商務及經濟局局長,在官方記招親口講出來?你當十四億玻璃心係流架?

指白為黑?係囉,黑色就係黑色,白色就係白色,所謂黑白分明是也;局長講到個問題係「非黑即白」,絕無灰色地帶,因此美國政府真係衰到加零一呀!居然要委屈我哋香港貨,走去做中國貨喎!政府高官講真話呀!係咪大新聞呀?早排劉兆佳鬧部份「建制派」欠缺「家國情懷」,嘩!惡意中傷中國貨係黑色,仲捉唔到你呢個匿埋在政府內嘅港獨份子?

美國政府取消香港嘅「特殊待遇」,決定「一視同仁」,把香港視作中國不可分割嘅一部份,希望香港「大家都是中國人」,要求寫住 Made in Hong Kong 嘅香港貨,「正名」為 Made in China,非常合理喎!平日你班自稱「愛國愛港」嘅人士,唔係一日到黑追問:「你是不是中國人?」唔係鬧香港人唔願中國人咩?點解貨就唔認中國貨,人卻要認中國人?你搞港獨呀?做咩搬龍門呀?

以前航空公司畀我哋選擇來自香港,中國政府就施壓,要先選擇中國,才可以選擇香港;以往體育比賽我哋叫香港隊,你就話係「中國香港隊」;以往郵政寫住香港,你就先加中國,再連英文都加埋 China 落去;政府一日到黑鬧香港人「勾結外國勢力」,話外國「煽動港獨」嘛,家下美國政府遂你心意,直頭取消 Hong Kong,全部都要「正名」China,你有咩唔滿意呀?

四年前青年新政兩位立法會議員,游蕙禎與梁頌恆,拎住張 Hong Kong is NOT China 嘅藍色大Banner入立法會,中共又嬲到 DQ佢哋;咁美國家下認同你 Hong Kong is China 了,你又有咩唔高興先?香港係咪中國不可分割嘅一部份先?美國聽左你「港版國安法」,Donald Trump 好驚你用「國安法」對付佢,腳軟咪認「只有一個中國」囉,做咩又唔滿意?又要搵嗌交部同膠騰華出來抗議?咁唔高興,不如搵返佢兩個入立法會,或者派佢哋去美國宣示下嗰枝旗呀?

1986年以 Hong Kong 名義加入 GATT,因此1995年香港成為世貿即 WTO嘅創始會員,中國要遲至2001年12月才成為會員;原本好好地,香港就係香港,全名就係 Hong Kong,偏偏有人係都要改個會員名做 「Hong Kong, China」喎;咁美國要你「正名」,加返 China落去,邊個嘅錯呀?做咩會員名就要叫 China,貨物上又唔寫China 先?驚 China 影衰你件貨呀?驚 China 係黑,Hong Kong 先係白呀?你做咩歧視中國貨?你做乜歧視中國?

中國咁好,你做咩唔願叫?唔係話中國好強大,全世界都好羨慕中國咩?有咁好嘅中國名唔用,用香港?唔係話香港已經冇人關心咩?唔係話香港已經被邊緣化咩?呢幾年日日都話大灣區有幾威水,唔係話大灣區係大勢所趨咩?人流物流互通將會不分彼此咩?大灣區唔係中國係乜野?

美國政府尊重你中國搞「大灣區」,幫助你把香港完全合併成大灣區一部份,邱騰華你有咩唔滿意先?反對大灣區呀?定係認為原來認為「大灣區」應該係叫 Hong Kong,變相分割中國大陸領土入香港?嘩,邱騰華你真係處心積慮搞港獨,連大灣區都想食埋!而且仲要唱衰中國貨係黑色,大家真係諗唔到呀!!!

----------------------------

ChannelNEXT人民學堂:識法大講堂

曾志豪X劉偉聰 同你拆解「港版国安法」

立即收看

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!