• 【疑違限聚、口罩令】全國政協委員新抱 前大台主播蔡雪瑩 一行五人公園除罩放電
  • 2020-08-14    

 

TVB天氣主播好多時都係觀眾嘅女神,黃婉曼、蔡雪瑩、梁凱寧等等。其中,兩女之母黃婉曼已經返咗「娘家」做嘢;梁凱寧離開無耐又喺友台工作,唔會咁快食回頭草;至於都係生咗兩個、一仔一女嘅蔡雪瑩呢?少奶奶得閒無事,一家四口去戶外歎住香檳放電好過啦。

現齡33歲蔡雪瑩,2014年離開TVB後做過公關、freelance司儀等等,但最主要工作都係2016年下嫁上市公司亞洲木薯太子爺朱威霖之後做少奶奶。

雖然近日確診數回落,但始終仲有每日幾十宗,唔可以掉以輕心。偏偏,蔡雪瑩一家淡淡定,開晒帳篷戴晒超,剩係唔戴口罩啫,不知幾CHILL:3歲仔顧住玩電話,兩歲女等緊老竇削蘋果,最歎就係蔡雪瑩,全程趴喺度當正自己屋企一樣隨意、放鬆,身邊仲放住支浸緊冰桶嘅香檳,歎到呢!講真,少奶奶咁寫意,唔會返大台啩。

其實,當初蔡雪瑩離開大台,係因為覺其他新晉新聞小花92年出世,自己就係87年已經28歲,假如日後結婚生仔,仲可唔可以繼續做主播呢?做得幾多年呢?會唔會愈做愈低呢?認為到時30幾歲先轉行的話條路就難行喇!所以,蔡雪瑩毅然離開轉做公關嗰刻,傷透唔少觀眾心㗎。不過公關佢都做唔耐,大半年就頂唔順,話朝九晚五坐定定悶喎。原來怕悶,唔怪得武肺肆虐都少理,照樣拖男攜女除罩仲違反埋二人限聚令去放電啦。

其實違令,又有乜好怕喎。蔡雪瑩老公朱威霖係典型嘅政商富二代,當年結婚時賓客不乏政要商賈,包括當時嘅中聯辦主任張曉明同前一哥鄧竟成都係來賓之一。

老爺朱銘泉仲把炮,唔只係亞洲木薯董事局主席,仲係全國政協委員,加上一大堆香港山東乜乜會長、香港福建乜乜主席,近日又喺文匯報大讚警方拘捕黎智英合理合法大快人心,「相信絕不是針對傳媒,亦不涉及打擊新聞自由」。

兒子新抱疑違限聚、口罩令?你真係同佢定。

----------------------------

無懼白色恐怖 黎智英劉細良開講抗港版国安法

立即收看ChannelNEXT《人民學堂》

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!