• 【為個仔扭親頸都唔唞】58歲杜德偉北上搵銀前 把握機會帶3歲AJ四圍放電
  • 2020-08-10    

 

本港疫情曾連續十二日逾百宗確診,就算近日回落至雙位數,但市民仍不敢鬆懈。小朋友就慘喇,無乜機會出去玩,話晒暑假喎!所以,杜德偉有「先見之明」,較早前趁疫情放緩少少未有咁誇張時,嗱嗱臨一家大細出多幾日街,畀3歲仔AJ好好放電。

據聞因內地疫情好轉,拍攝工作逐步恢復,58歲杜德偉已經身在大陸完成居家隔離並且開工拍劇。換言之,3歲AJ想好似之前咁一家人去街兼飲飲食食,要再等等喇。好彩嘅係,杜德偉上大陸之前、趁香港疫情每日破百之前,唔只趁迪士尼短暫重開去玩去癲,仲周不時一家三口去街街,《壹》仔都撞過佢哋幾次。

例如,成家去公園放風。大家有無留意到杜德偉戴晒頸箍呢?原來佢做運動整親條頸,但受咗傷都唔唞下,堅持帶個仔出去享受家庭樂,真係唔話得!至於AJ,咪睇佢肥嘟嘟,其實都幾靈活,右至左跑過去,左至右滑板車踩返過嚟,之後又擒高擒低,真係遺傳到老竇少少身手㗎。杜德偉見到個仔咁活潑可愛,都忍唔住捽佢面珠墩,再錫多啖。當然都要醒杯雪糕AJ歎啦,食到連阿媽影相都唔望鏡頭呀,難怪杜德偉都叫個仔做「肥仔」。

隔一排,佢哋一家又現身,今次係行下商場再食餐飯。講到食,AJ當然「嚼嚼聲」食唔停啦,但就唔小心跌咗食物。佢立即用眼尾睄下父母會唔會話兩句,發現無事喎,就執返上嚟食。表情多多相當趣緻!不過,同媽媽去洗手間嗰陣,兩母子竟然唔記得戴返口罩,大意咗少少,好在當時疫情稍為放緩,商場人流又唔多,而且只係短時間無戴,還好啦。之後一家人食完飯都立即戴返晒,亦唔再逗留公眾地方,準備坐車返歸。等車期間,舞王杜德偉跳起舞嚟,但條頸未好返,唔可以太大動作。AJ被老竇扭身扭勢感染,學人走嚟走去扎扎跳,搞到舞王都要停低金睛火眼睇實呢個「金笸籮」。

杜德偉條頸已經好返兼北上工作,兩父子分隔兩地,難怪成日喺網上嗌掛住個仔嘅,唯有翻睇AJ啲短片解相思啦。不過,杜德偉有時睇睇下片覺得吹漲,事關有條片內容係:老竇幾十歲人仲要辛苦操弗自己去搵錢,個仔就企埋一邊印印腳食嘢,感嘆「老竇搵錢仔享福」。連網民睇到條片都留言:「AJ細細個已經好清楚成功靠父幹,心諗睬你都傻,食嘢要緊。」

----------------------------

無懼白色恐怖 黎智英劉細良開講抗港版国安法

立即收看ChannelNEXT《人民學堂》

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!