• 【禁忌之林】柒婆之全民驗孕(林忌)

  • 發布日期:2020-08-07 15:30
  • 【禁忌之林】柒婆之全民驗孕(林忌)

 

「日日驗孕身體好!男女老幼做得到!」

「支持全民驗孕!你唔驗,點知自己懷孕未?呼籲全香港750萬人,人人都要驗孕,要經過政府認證嘅驗孕測試,證明自己未懷孕!」

處女要驗孕,妓女唔使;男人要驗孕,豁免部份女人唔使;有冇咁嘅道理?有,只要你出入得夠多,屬特殊待遇就免驗;反之你零風險,班中國專家都話要全民驗──來自中國例外。

「只要750萬人驗左孕,就可以阻止大肚!就可以防止落仔!一群想活命的香港人表示,反對驗孕,係比病毒更可怕的私利、政見、顏色的盤算,違背常識與良心,令港人深受其苦!」

個腦冇病嘛?係咪你今日驗左,聽日就唔中?係咪你驗過一次唔中,然後就可以一勞永逸,從此高枕無憂?班「中國專家」、柒婆友好,吹到200萬、750萬驗左,就可以解決問題──乜問題係化驗咩?個問題係柒婆大開中門,任人中出呀!究竟呢幾個月係咩人「免檢疫」,畀29萬人輪?

本來無一物,何處惹塵埃?無論係精子或病毒,都唔會無中生有;你冇「外來輸入」,係唔會無端端出現!當香港堅拒封關,繼續「免檢出入」,就有如柒婆繼續日日開無遮大會,六十路激情四射,然後成班廢老慶回歸跳老舞唱紅歌,你今日驗左冇,聽日呢?後日呢?呢刻驗到冇又有咩用?就算750萬人驗到冇,又有咩用?成個六月都好安全啦,然後七月用左幾多日就破功?

第三波武漢肺炎疫情,由慈雲山、黃大仙以至的士嘅傳播鏈,專家追完話有三個源頭,只係三個人,由6月28日1200個感染,去到8月6日就變左3850個感染,只係一個月加一星期,就令香港感染個案足足增加左2650個,係早前半年嘅2倍有多;勞師動眾全民檢疫,換來嘅就係只需要三個人,就可以令全港防疫破功,你唔阻止人進入,又唔停工以至封城,病毒照樣入境,染病者繼續四圍播毒,就算你捉晒全香港750萬人檢疫又有咩用?做完檢疫,一個月後又中,呃大家去驗,又有咩用?

更可笑嘅係,非香港人就繼續可以「免檢疫」出入香港,換轉係香港人自己,即使日日唔出街,卻要「強制檢疫」──高風險自出自入就唔使查,低風險甚至冇風險,卻要強制「驗孕」,有冇咁嘅道理?明明七月頭都已經知道病毒在社區散播,月底甚至日日過百單,偏偏死唔停工或最起碼半工,繼續叫大家準時返工,咁既然當初都冇需要驚,而家做咩迫人驗?何況中國製嘅試劑,有幾多「假陽性」?特區政府嘅衛生署唔係堅持,話「初步確診」唔代表「確診」咩?驗完除左自己嚇自己,或者畀自己「虛假嘅安全感」,以為冇事又出去滾,繼續四圍去,或繼續畀人四圍入,唔切斷香港內外嘅交通以至人口流動,根本完全控制唔到疫情。

要防止感染,就係要切斷傳播鏈;正如要防止懷孕,就係要停止性行為;唔停止,你年年月月日日驗一次,又有咩用?唔封關,只係爭論驗幾多人,由始至終都只係做緊利益輸送中國公司,以至製造藉口畀人收集香港人基因;收左會點處理?有人講《私隱條例》?從來都唔規管運私隱出境外嘅行為,政府話「基因送中」係「謠言」喎,你信唔信佢呀?你信唔信柒婆呀?

----------------------------

ChannelNEXT人民學堂:識法大講堂

曾志豪X劉偉聰 同你拆解「港版国安法」

立即收看

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!