• 【轉行做醫療】44歲韓君婷協助收集深喉樣本:而家工作幫到人係積福
  • 2020-08-08    

 

1997年亞姐冠軍韓君婷,人生經歷過初戀男友患癌病逝、厭食、抑鬱、仆崩鼻等等,前年相依的媽媽又離世,真係波折重重。好彩有個「好朋友」蔡國威互相扶持,加上近年轉行喺醫療美容機構工作,生活唔只重回正軌,更為防疫出一分力,佢自己都覺得「而家工作幫到人係積緊福」。唯一甩唔到嘅,就係煙癮。

早前喺街見到44歲韓君婷,抆低個口罩食煙(當時未實施室外戴口罩令),而且一身制服十足美容師打扮,乜武漢肺炎疫情下美容院唔係要停業咩,點解仲要開工嘅?

一問得知,原來韓君婷負責醫療範疇嘅文職工作,美容部門停工啫,醫療部仲要做,而且武漢肺炎嘅防疫工作,佢多多少少都有參與其中,有貢獻㗎!事關韓君婷公司有收集深喉唾液樣本服務,繼而將樣本送去政府認可嘅檢測機構進行化驗。喺收集前後,韓君婷就需要協助以及跟進,起碼都要問清楚對方有無近距離接觸過確診者等等背景啦,都咪話唔「牙煙」。

不過,韓君婷覺得還好,因為採集樣本時間要求起床後、刷牙漱口及飲食前,而公司位於商業大廈唔近民居,所以客人唔多亦唔算忙。而且,比起「牙煙」佢更加認為:「而家工作可以幫到人,我覺得係積緊福㗎。如果你唔幫市民收集樣本,佢哋就要喺街排隊拎檢測樣本樽,都唔知要排到幾時。算係做返啲可以幫助社會嘅嘢囉,何況公立醫院爆晒棚。咁診所有lab嘅話,我哋啲行家都好樂意幫手。所以,真係要向醫務人員致敬,我呢啲留後嘅文職只係幫下手啫,前線嗰班真係要向佢哋鼓掌。」

相當正面,亦聽得出韓君婷幾鍾意而家嘅工作,應該真係同以前嘅抑鬱症劃清界線喇。呢一點,相信有傳係同居關係嘅「好朋友」蔡國威,都有功勞,韓君婷都直言「呢個好朋友好緊要㗎」。「我哋仲係好朋友,係非常好嘅朋友,好朋友唔會突然間無咗嘅。我個好朋友好緊要㗎,尤其呢段時間大家一齊捱咗咁耐,所以有朋友支持係件好事嚟。」佢講得含蓄隱晦,但聽得出嘴角含春,相當甜蜜。

另外,問到娛樂圈工作方面,韓君婷指比較少搵佢,「可能大家都覺得我而家嘅工作穩穩陣陣幾好」。但,佢有感而家網上平台發達,比起舊時其實多咗好多機會畀觀眾見到自己,所以間中都會拍下片擺上網開心share咁話。

----------------------------

無懼白色恐怖 黎智英劉細良開講抗港版国安法

立即收看ChannelNEXT《人民學堂》

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!