• 【6億身家奉獻徐濠縈】Eason停工侍妻女 幫阿徐抹鼻做跑腿 疫市賺少半億
  • 2020-08-07    

 

同徐濠縈結婚16年,陳奕迅絕對稱得上「寵妻號」!多年來,Eason 為了讓老婆和囡囡過最優質的生活,一直肩負起賺錢養家的重任,難免犧牲了親子時間。在疫情之下,Eason 難得可以抖一抖,近期將所有時用來陪住老婆同囡囡。日前《壹仔》見到Eason 一家三口合體,湊狗仔去睇醫生。有老公服侍,阿徐全程做「女王」,所有體力勞動功夫,交晒俾Eason一手包辦。廿四孝老公,Eason 真係當之無愧啦!

2.3億大屋送老婆

Eason錫老婆一向都行動最實際!當年佢一炮過用2 .3億,買入壽臣山村道3200呎獨立屋,用老婆個名一個人持有,夠晒豪爽!另外,Eason 知道阿徐一向恨開時裝店,二話不說就打本7位數畀老婆開舖,目的唔係為賺錢,只係畀老婆打發下時間。

唱到喉嚨生繭

一家三口要過最高質的生活,Eason 當然要努力跑數,最高紀錄的一次巡唱,Eason 唱勻內地、星馬、美加、歐洲所有大城市,唱足71 場。雖然有過億落袋,不過Eason就唱到喉嚨生繭,真係有血有汗!稍為減產幾年,本身上年年尾,Eason 打算再啟動搵錢模式,可惜又遇上社會運動,加上疫情,個唱要煞停。原本在紅館的25 埸個場,加上已經計劃了的巡唱,全部要取消。近8個月,Eason 起碼賺少半億。

湊狗睇醫生

不過,錢財身外物!賺少了錢,Eason 反而換來大量陪屋企人的時間。今年年初,一家三口去完滑雪,呢日又俾《壹仔》見到Eason 陪住阿徐同包包,一齊湊狗睇醫生。去到診所,阿徐同包包負責同狗仔見醫生。至於Eason 就發揮「吹神」本色,不停撩診所內的女護士吹水,仲講到手舞足蹈。兩母女冇咁好氣,唯有行埋一邊,阿徐更時不時幫狗仔拍片。見完醫生後,唐狗Brownie不知幾精靈,相信應該冇乜大礙。

甘願做跑腿

一家三口離開診所時,Eason 一手就抱起狗仔。之後逐一安頓老婆、阿女,同埋狗仔上車,轉頭就急急腳跑去附近的咖啡店,買了兩杯咖啡。期間Eason 更幫老婆打開杯蓋,見阿徐個鼻污糟,又拎紙巾幫佢印乾淨,估唔到Eason 都有暖男的一面!招呼完兩個女人,Eason又再跑去咖啡店,今次再買多一杯咖啡比自己。之後在返歸途中,Eason 突然又跳落車,一直跑去搵藥房,買完幾支眼藥水後,又好心急9秒9跑返上車。跟住一家三口就揸車,返回壽臣山村道而家已經市值4億的寓所。

6億磚頭同老婆分享

其實除了壽臣山村道的獨立屋由阿徐獨有,Eason 手上其餘的磚頭,都係同老婆聯名。早前他們在黃竹坑環匯廣場,連環掃入了多個單位。其中有兩個中層單位,市值約6000萬。另外,14年,他們又以約8400萬全層買入其中一層高層,而家市值約1.5 億。其實早在96 年,兩公婆已經用公司名義聯名買入上水奕翠園單位,而家市值1300 萬。計一計數,Eason 搵落超過6億磚頭,全部都同老婆分享。

15歲包包有拖拍

據知,Eason 之所以咁錫阿徐,因為多年來他一直忙住搵食,經常四圍飛,而阿徐就負責打理頭家,同埋照顧包包。包包能夠順利入到女拔,兼且品學兼優,全靠阿徐的功勞。加上阿徐亦懂得用開放的態度同阿女相處,兩母女情同姊妹。兩年前,包包被雜誌影到同「翻版彭于晏」手拖手行街,事後阿徐就開通表示自己一早知道,更同阿女的男朋友仔見過面。事實上,已經15歲的包包長得亭亭玉立,而且愈大愈省鏡,有裙下之臣都好正常。而家包包已經高過媽咪,仲有一對超長腿。加上遺傳了媽咪的扮靚DNA,衣着有晒阿徐的影子,將來分分鐘可以繼承阿媽衣鉢做「潮人」啦!

----------------------------

無懼白色恐怖 黎智英劉細良開講抗港版国安法

立即收看ChannelNEXT《人民學堂》

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!