• 【街市爆疫重裝備自保】68歲洪金寶鬧政府抗疫反智:再咁落去 如去十八層地獄
  • 2020-08-05    

 

口罩打孖再加防面罩

香港人抗疫,由年初經歷撲口罩之苦,到今日仍然面對政府不封關的頑硬,漏洞多多的檢測、及豁免檢疫的政策,觸發第三波疫情爆發,繼續由市民找數。

68歲,向來有碗話碗,有碟話碟的影壇大哥大洪金寶,今年三月曾以:「寡母婆死仔,無晒希望!」,形容港府抗疫無能靠不住,一針見血,講出大眾心聲。

歷時大半年,香港失守,進入更嚴峻的第三波,上了年紀的大哥大洪金寶,防疫全不鬆懈。日前見他外出「放風」,買餸解悶,他的一身裝備,對比三月更加重型。除繼續打孖上的口罩、手套,還加一個膠面罩做防疫牆,包頭巾再加頂草帽,成副「武裝」份子,殺入街市,連陪他出動的菲傭都同樣嚴陣以待,口罩打孖上。不過腳患復發,當日他為速戰速決,索性用電動輪椅代步。

大哥大洪金寶對政府抗疫搖頭嘆色:「唔好話第三波疫情,如果香港政府繼續咁樣,第八波、第一百波都有可能發生。」

嘲早午堂食禁令反智

事後本刊跟大哥大洪金寶通電,他坦言自己屬疫情下受威脅的高危一族,妻兒都怕他外出。「天明有叫我唔好出去,不過有時候都無辦法,都想出去買餸伸展下,最多盡量做好防疫功夫。」

面對第三波,大哥大對責無旁貸的政府高官好激心。尤其只實施兩日,就全城鬧爆下收回的全天候堂食禁令,司長張建宗簡直完美演釋他口中的「張弛有道」!連大哥大都忍唔住,揶揄一班反智的高官。

「我唔知香港高官有咩諗法!叫所有人唔准堂食,然後提供地方畀人去食,即係所有人去嗰個地方就唔算聚集?

咁不如我大方啲,叫高官喺上水或者香港仔買飯盒,然後嚟我上水屋企食飯,我提供地方畀佢哋集體食飯。叫佢哋唔好坐巴士,因為有太多聚集,每個人踩單車過嚟!」
疫情對上了年紀的人最受威脅,加上街市爆疫,愛逛街市的洪金寶,直言家人勸他減少外出。他偶爾外出,也會重裝備防疫自保,顧己及人。
早前政府的早午堂食禁令,搞到戶外工作的市民忍受日曬雨淋踎街開餐,現代城市變第三世界。結果捱轟下,改為開放社區中心做午膳地方,翌日再修改為二人早午堂食限聚令。政府抗疫,如撲口罩一樣,笑話!(圖片:蘋果日報)

隔離政策荒謬如虛設

不過無論市民如何防疫,政府仍不聽專家意見,堅持不封關、繼續豁免檢疫,如無掩雞籠,對此大哥大亦嘆謂:「我一向都叫所有香港市民要靠自己,唔好話第三波疫情,如果香港政府繼續咁樣,第八波、第一百波都有可能發生。」

講到隔離政策,大哥大說最近有親身經歷,體會當中之荒謬。「呢個係我嘅親身經歷,我嘅工人喺菲律賓返港,然後我搵地方畀佢隔離十四日,酒店由我哋俾錢。」

隔離其間,這位菲傭再次進行深喉唾液檢測,就發現這個隔離政策,原來如同虛設。

「十日後要檢驗佢嘅口水,佢哋(衛生署)竟然要工人自己搵人,將口水唾液送去油麻地檢驗,呢啲係咩嘢政策?

我問點解工人啲口水液無人去攞?對方話請唔到人,香港政府請唔到人!我唔會講政治,只係用眼去睇。好似條手帶咁,你見新聞幾多隔離緊嘅人,仲可以周圍去,追蹤唔到!咁要條手帶嚟做乜,做乜要花咁多錢整條隔離手帶,根本同戴張紙條冇咩分別!真係荒謬到不得了,我唔想批評政府,不過政府對疫情有做過咩嘢幫助?」

提海員豁免檢疫把幾火

眼見香港疫情失控,日日過百宗,政府後知後覺,上周才收緊豁免檢疫,大哥大同好多市民一樣,把幾火!

「呢個星期(上周)先至禁止海員,之前一直都無禁,唔需要檢驗就可以周圍去,病毒佢哋有份帶嚟,海事處有冇解釋過?點解呢方面要豁免呢?點解完全唔使檢驗呢?

而家香港爆發第三波,惟有叫市民睇開啲,自己小心啲,香港政府繼續咁樣,我諗應該會有第十八波,同落第十八層地獄一樣。」

高官冥頑不靈,市民最緊要識自保。當日所見,重裝出動的大哥大洪金寶精神不錯,臉龐依然脹卜卜,身型亦保持份量,絕不如早排藍校長(譚詠麟)分享飯局照中的暴瘦。

自言因血糖踩界,需要減肥的他,說至今已減掉廿磅,比以前輕型了點。在此祝大哥大身體健康,正如他所願: 「想有150歲命陪孫兒!」
早前與阿倫的飯局相,大哥大洪金寶顯得暴瘦,但日前見他真身,並非如相中般瘦,且精神不俗,身形依然有份量。
街市爆疫,買餸速戰速決的他,索性坐電動輪椅代步,到返回座駕,有腳患的他行動亦不算緩慢。

----------------------------

ChannelNEXT人民學堂:識法大講堂

曾志豪X劉偉聰 同你拆解「港版国安法」

立即收看

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!