• 【禁忌之林】柒婆嘅快樂午餐|林忌
  • 2020-07-31    

 

「又到食Lunch時間啦!唔堂食?有咩所謂呀,廚師幫我煮好晒,坐定定等開餐;即使當年後生,都可以叫秘書幫我買外賣,再在自己Office慢慢嘆,又唔使迫,又唔使同人爭,係咪德政呢?出去食飯咁waste time,浪費生產力,最好都係叫人幫自己買外賣呢......」有個唔識用八達通嘅柒婆,心底如是說。

「喂,地宗海,不如全日禁食肆堂食,你冇反對呀嘛?」

「冇問題呀,禁啦禁啦,大家返Office食咪幾好,又闊落啲,又唔使出去,你都知大熱天時行過去Hong Kong Club幾辛苦,想當年都冇私家車接送,由舊總部行過去成十分鐘!慘過去死呀!我套西裝雖然唔值4萬銀嘅Brioni,但係成身汗要保養都好困擾呀!」

「係囉,諗返起後生果時呀,要走上去FCC同班記者social,行上行落條斜路,真係冇陰功呀!禁堂食,一定係德政!」

「啱呀啱呀!家下後生女識用 Internet,冇得出街食,咪DayDayCock囉(哎呀冇串錯字),早排先見到佢哋教上湯蟹柳浸白蘿蔔,首先倒買返來嘅盒裝上湯,然後倒買返來嘅蟹柳,再放在買返來嘅白蘿蔔上面,食得!又使乜出街食飯呢?」

「係囉,Pantry咩架生都有,今時今日用叮叮乜都熱得返啦!鍾意買外賣咪自己或者叫人幫你叮返熱來食囉,坐喺度自己食咪幾開心,唔使下下約朋友傾偈呀,唔使侍應生照顧,有時都幾好呀」

..............................................

「喂,班記者不斷問,話班工人冇地方開餐點算,你有咩建議點答呀?」

「吓?乜有人冇地方開餐咩?」

「係囉,咪返Office食囉,邊間報社冇野搵野來鬧呀?係咪壹傳媒呀?叫佢哋舉實例啦」

「好似話清潔工同地盤工喎,話要坐在地下食飯喎」

「吓?冇辦公室?乜有人冇辦公室架咩?啊,唔緊要啦,叫佢哋去公園食住先啦,香港咁多公園未拆來起樓,總有一個在左近」

「啊啊啊,記者話早排我哋先封左公園,康文署班衰仔封晒公園唔畀坐喎」

「去沙灘啦!車去淺水灣定石澳食咪得囉,廿分鐘就到」

「唔好意思呀,記者話呢兩日連沙灘都封晒,連沙灘場內個廁所都封埋,冇地方食野喎」

「咦?公園封左,沙灘封左?咁不如郊野公園呀,我哋未封晒呀」

「好啦,地宗海你就出去同記者講,話叫班工友去郊野公園食Lunch啦」

..............................................

「啊啊啊啊啊特首同各位司長大人,班記者影晒相,話班清潔工坐在廁所開餐,班地盤佬就坐在地下開餐,啲相好難睇喎」

「盲炳強,你點做嘢?坐在地下聚集,唔係違反限聚令,就係違反國安法,做咩唔開晒佢哋?班地盤佬一定係收泛民同外國勢力指使,一心一意顛覆國家政權咋?」

「Err..Err….Err…. 唔係啦,今鋪佢哋真係只係開餐啦,連CGO(政府總部)下面班伙計,都話冇地方食嘢好唔方便」

「自己伙記唔方便?唔得,一定要畀佢哋有地方食野,不如開返啦!驚病毒違反國安法,顛覆國家政權走去感染政府總部嘅公務員?諗條橋好喎」

「啊,為左唔好畀人話偏幫我哋伙記,就不如限制每張檯只可以坐一個人,咁咪符合社會期望囉」

「就咁決定啦,我哋政府做野一向不備不倚,最憎被人屈係官商勾結、特權之類,全部絕無此事呀」

..............................................

「哎呀,原來咁多人冇地方食飯架!」

「係囉,以為係班傳媒吹水,原來真係排長龍仲要坐地下」

「哎呀,點解冇人去郊野公園食飯?」

「乜原來有咁多人堂食架?」

「唉,一定係黃絲陰謀,不過今鋪民情咁反彈就算啦,畀佢哋朝午做返堂食啦」

「記者問咁樣係咪出爾反爾,問朝令夕改點算,我哋點答呀?」

「啊,叫新聞處同事,出多個聲明,警告隻病毒千祈唔好違反國安法,話透過滲透餐廳去傳染肺炎,係恐怖主義活動,咁咪得囉!」

按:本故事屬純虛構,但相信足以反映到狗官嘅智商與心理狀況

----------------------------

ChannelNEXT人民學堂:識法大講堂

曾志豪X劉偉聰 同你拆解「港版国安法」

立即收看

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!