• 【禁忌之林】英國佬:拒承認BNO?你大我呀?|林忌
  • 2020-07-24    

 

香港人最大問題係失憶;記唔記得,呢十幾年究竟有幾多人,有份唱衰BNO?唔好講遠,兩個月前有幾多所謂KOL?聽到話BNO有得移民英國,就係度瘋狂唱衰,話只係呃你去一年工作假期,最終冇得移居英國?

兩年前成班藍絲係度瘋傳,叫人出外要拎埋回鄉證,吹到全地球中國都會出戰狼救人,不斷呃人話BNO冇用,英國領事館唔理,甚至連旅遊業界代表都可以上報紙老作;去到呢兩日,一堆親共報紙,以至「扮中立」嘅傳播,都吹到BNO冇用,「呃香港人做水魚」、「二等公民」、只係去「搬磚」同埋「摘生果」,講到咁悲慘嘅遭遇,對中國政府來講,唔係應該「好行唔送」,送走呢班唔願做中國人,甘願做咩「殖民奴」嘅香港人咩?真係好奇怪,做咩「嬲嬲豬」,要「報復」?


更搞笑係英國BNO移民政策一出,中國球迷初傳嘅第一招反制,係當晚中央電視台停播英超,憤怒嘅中國球迷質疑冇英超睇,要改睇中超,後尾發現唔知係中共縮沙,定大陸網站自己驚到報流料,就改由「嗌交部」話「考慮」反制中國唔承認BNO作為旅遊證件!大家聽到拗晒頭──乜BNO可以用來去中國大陸咩?除左少數海外例子外,不嬲都唔畀啦,你唔「承認」,又有咩用?事實上中共在1996年嘅人大「解釋」中國國籍法,早就話唔承認BNO以及因為居英權而得到嘅英國公民身份,而只係承認 BNO 係一本「旅遊護照」;家下唔認旅遊護照,又點呢?

中國玩呢招最基本嘅影響,就係一旦有人持BNO在其他國家犯法,當人哋要「遣返香港人」時,特區政府可以玩「拒收」,變成一定要由英國收;但其實以往BNO 免簽問題上,早已出現呢個危機,英國亦明顯改變政策,自六月起,官方把以往稱為英國國民(海外)嘅BNO,改叫做BN(O) Citizen,加入「公民」一詞;明顯轉成承認 BNO 嘅「英國公民權」(不過有限制,唔可以拎福利)。而最新安排之巧妙,係包括你即使冇BNO護照係身,只要入境英國時對到你紀錄,一樣可以享受BNO嘅簽證安排,入左境先再安排補領。

驚中共禁BNO離境?首先香港出入係一向用身份證;至於航空公司要登記你護照,係講緊目的地接唔接受你本護照,而且外國航空公司可以唔理你;當然中共港共要玩嘢,例如禁區要檢查你有冇特區護照,唔係唔得,咁最差情況,咪市民要袋多本特區護照,或者史前文物《回港證》,5年版盛惠$170囉。

英國亦大把招可以倒轉玩;原本BNO與英國公民護照 (BC),只係得封面唔同,即係BC封面寫住 European Union,而BNO冇;自從上年英國脫歐嘅舊期限起,BC續護照,自EU版用晒後,都已經改用BNO版,即冇EU字眼嘅護照,因此兩本護照嘅外表完全冇分別,唔仔細睇內頁,係無法得知佢係BNO定BC。亦因此,如果港共玩到咁串──機場限制BNO出境嘅話,家下既然英國已經決定接收BNO,索性成本BNO嘅內頁改到同BC一樣,對英國來講亦冇分別──入境英國時過機,電腦對到你詳細資料就知身份;家下連BNO都升做「公民」,統一兩者外遊免簽嘅待遇,亦指日可待;你有本事 ban 晒英國護照離開香港呀笨?

當然,中共或港共可以禁英國護照;同理,英國以至五眼聯盟各國,亦可以禁中國護照及特區護照報復,唔好忘記早排美國通過香港自治法案,已經明文要廢除特區護照嘅「特殊待遇」,要和中國護照睇齊;無數中共高官家人太子黨,好似孟晚舟之流咁拎住特區護照四圍去,你禁BNO,人禁返你,原來又想加速攬炒?

國際金融中心有如賭場,最驚就係唔畀你贏錢走;突然話要禁人走?中國愈玩禁招,BNO就走得愈快;同理其他外國公民以及企業,都會好擔心第時會唔會封港,會唔會沒收外國資產?中國出招愈狠,大家走資就愈快,原本冇打算咁快移民,都立即加速移民!唔係話《中英聯合聲明》係歷史文件咩?做咩而家老屈英國違反條約先?告佢呀笨?

----------------------------

ChannelNEXT人民學堂:識法大講堂

曾志豪X劉偉聰 同你拆解「港版国安法」

立即收看

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!