• 【做義工清理山野垃圾】岑樂怡嬲爆經歷:我一邊執大媽一邊揼,仲扮唔識廣東話
  • 2020-07-29    

 

上山避疫還是播毒?三步口罩,五步濕紙巾

武漢肺炎疫情持續,市民避疫,盡量唔去人流密集市區,但長期匿喺屋企又唔係辦法,所以都不約而同諗起郊遊、遠足、行山。咁有益身心嘅活動,本來係件好事,理應支持。不過,往往留低嘅都係一地垃圾!

阿妹(岑樂怡),由NowTV到ViuTV,憑遠足行山類節目打響名堂,《山步行》系列唔係無睇過吓嘛?在公在私佢都熱愛大自然,其YouTube頻道《岑樂怡和你Green》就係圍繞環保,仲會參加義工活動邊行山邊執垃圾,但佢一路執、人哋一路揼,感受都咪話唔深。

「其實最近疫情關係,有好多人愛上行山呢個玩意,但帶嚟嘅後果就係山頭充滿垃圾。多咗人行山,某程度上係開心嘅,但如果唔係擁有一個愛護大自然嘅心態,我寧願你唔好去行。」阿妹亦說,矛盾嘅係,山路上三步有口罩、五步濕紙巾,究竟係上山避疫,還是播毒?仲有執都執唔晒嘅膠樽、啤酒罐、零食包裝、壽司盒、老麥外賣紙袋……上述呢啲都算易執,最難搞係煙頭,數量多size又細,仲有機會引起山火,馬鞍山郊野公園鹿巢山長達400米嘅火線仍然歷歷在目呀!學阿妹話齋:「你哋就開心,歎完就隨便掉低,幾方便。大自然就真係要喊!」

+12

大媽亂揼垃圾,扮唔識聽廣東話

留低垃圾,唔只禍及大自然(包括野生動物),仲會辛苦一班腰都伸唔直、行路步履蹣跚嘅年長清潔工!「即使將垃圾丟喺山上垃圾桶,但要諗吓啲公公婆婆,佢哋其實好大年紀,所以有時見到佢哋拎住一大袋垃圾,真係會好心痛。最慘嘅係,有時啲人唔會將垃圾放入垃圾桶,而係放喺旁邊,變相清潔工人要做多一重工夫,先至可以清理好。」唔剩係阿妹咁講,都有網民影低老人家清理垃圾情況,堅係有圖有真相。

稍為有啲同理心嘅人,莫講話老人家,見到義工團體上山執垃圾,都會識得反省下,然後袋走自己啲垃圾落山先揼。偏偏,總有啲冥頑不靈嘅人,阿妹親自同呢種人交過手,佢話:「有一次真係好深刻,話說嗰次喺獅子山執垃圾,有一班姨姨坐喺度享受緊雪梨同香蕉。當時我喺佢哋旁邊執緊煙頭同膠樽,佢哋見到我哋執緊垃圾,但佢繼續好順手拋出食完嘅香蕉,蕉皮就沿住懸崖邊跌落去,我叫都叫唔住,當刻我真係好惡咁問佢做咩?佢即刻扮唔識聽廣東話,我就用普通話、英文,用唔同語言同佢講一次,然後佢身邊嘅朋友仔就開始過嚟想息事寧人,搶走佢手上其他垃圾,表示會袋喺自己背囊帶走。嗰一刻我感覺真係好嬲,點解要咁唔愛惜大自然呢?」

以生命影響生命

面對上述情況,谷鬼氣、被呼籲包容,然後無限重複loop,絕對唔係辦法。當然,辦法其實有好多,例如殺雞警猴、唔見棺材唔流眼淚,甚至用生命影響生命。阿妹選舉後者,不時與志同道合嘅義工團體,帶齊架生清理山野,「因為行山執垃圾嘅過程,係會影響其他行山嘅人,佢哋有時見到你行山執垃圾,就會鼓勵你,讚你做得好好,甚至有啲人會話下次都要好似我哋咁樣,帶個袋同夾去幫手維持大自然整潔。」

除咗以身作則,義工團體仲專登整咗條寫上「守護山野,一生平安;垃圾帶走,Thx!」嘅扣帶,喺執垃圾期間派畀其他行山人士,希望大家掛喺袋上起到互相提醒作用。原來,堅有用,「久不久就會見到年輕人,或者姨姨叔叔,自發一齊執垃圾」。對此,阿妹心情矛盾,一方面感覺好開心,可以影響到人;另一方面即表示仲有好多人亂拋垃圾。所以,佢話:「我寧願見唔到佢哋啦(執垃圾的人),當山上真係完全無垃圾,我哋唔需要帶住呢啲工具去行山,純粹享受大自然,咁就係最幸福。」



採訪、撰稿:ET

攝錄:千平

----------------------------

無懼白色恐怖 黎智英劉細良開講抗港版国安法

立即收看ChannelNEXT《人民學堂》

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!