• 鄭敬基離港返加國感自責 決心打國際線為港出力
  • 2020-07-22    

 

留言向王喜王宗堯道歉

鄭敬基日前再喺網上搞音樂live,同《自游Be Water》作曲填詞兼主唱的Dlo(癲佬)合作。鄭敬基同時公布,而家身在加拿大,6月底已經離開咗香港。

對於喺呢個時候離開,佢幾經掙扎,甚至覺得對唔住仍然留低嘅香港人。於是,佢留言畀王喜、王宗堯等同路人:「對不起,良善良知抗爭上我的啟蒙者。我帶著媽媽、老婆和小狗回加拿大去了。做這決定前後有莫大掙扎,請原諒我選擇了暫時放下香港。我還能為香港人做些什麼?我常問。然後我感覺怯懦,在混亂感覺中,我想可能仍可以以自己僅餘的身份,可以在國際線上出點力,亦已聯絡上有關組織努力中。希望你不以我為恥,更希望仍然接納我在香港這個時間有這個決定。謝謝你每一天無私的付出,畢生難忘。」

點解要離開香港呢?鄭敬基表示首要原因係照顧好屋企,佢話:「幾個月前媽媽返到嚟香港,佢因為隔離、手帶呢啲嘢受到好多精神困擾,所以媽媽一直覺得喺香港唔係太舒服。佢老人家87歲,臨走前仲跌過一次入咗醫院,好在無乜大礙。嗰刻開始我認為要快啲送媽媽返多倫多,因為屋企人例如我孖生妹妹、佢啲孫,甚至教會朋友都喺加拿大,我覺得媽媽喺加拿大會身心健康啲、開心啲。咁就趁媽媽復原,加上香港疫情有啲回升,所以我就同媽媽返加拿大。」同行的,仲有喺加拿大一個親戚朋友都無嘅太太,以及所飼養嘅寵物狗仔。

+6

決心國際線

鄭敬基一直認為,自己為香港所做嘅事唔多,無非都係出吓Facebook post、出吓YouTube post、唱吓online音樂會,而令人最深刻嘅就只有義無反顧咁剪咗TVB張工作證。佢自覺好似無乜嘢能夠做到,而家仲要離開香港,心中有愧,思考點先可以再為香港做得多啲呢?「國際線!」佢諗到嘅方法:「YouTube頻道呢啲,遲早連嗰啲八個字口號都要左閃右避,佢係要以言入罪對付你都無辦法,從此連呢啲平台都冇嘅時候,可以點呢?我就醒起國際戰線,再睇睇加拿大有無啲組織去幫香港人爭取呢?睇下睇下又有喎,咁就趁國安法一嚟,我可以聯繫呢啲機構、組織,希望自己成為一份子,喺國際裡、喺制裁上可以出力,咁我就做出呢個決定。

「啲機構好積極,我好喜歡入面班年輕人,大家取得聯繫,每日都會諗下有咩國會議員可以聯繫,希望有個積極性去聯絡多啲國會議員,希望能夠走進國會裡面將香港情況如實話畀人聽有幾危險、幾無言論自由,同埋會點影響下一代,話畀人聽滲透已經嚟到香港,喺加拿大亦滲透得好厲害。」鄭敬基續說:「呢班朋友成立咗好短時間,但做咗好多,畀咗好多壓力議員(加拿大),又做咗好多遊說,讓人知道香港人以及在港的35萬加拿大人有隨時被人以言入罪的危險,加拿大政府已經做咗決定,例如唔需要引渡條例,令好多人鬆口氣,喺加拿大就算講嘢都唔需要擔心被引渡,第二就係唔賣軍火畀香港警隊。」

鄭敬基唔只講,真係嘗試做。早前網上有人出post話喺加拿大見到鄭敬基夫婦參與一啲有關中國、香港嘅活動,事後更被「藍絲」狙擊:「直接將條片send畀中央審查組,等佢呢世都返唔到嚟香港及中國。佢喺嗰邊攪屎攪棍,由佢攪,理唔到,唔好攪亂或影響到中國、香港就得!」當時,鄭敬基未公布已離開香港,因此有人覺得「係咪點錯相呀」?而家先知原來佢真係去咗加拿大,真係打緊國際線。

----------------------------

ChannelNEXT人民學堂:識法大講堂

曾志豪X劉偉聰 同你拆解「港版国安法」

立即收看

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!