• 【禁忌之林】中國嗌交部強烈譴責|林忌
  • 2020-07-17    

 

嗌交部強烈譴責美國干預內政、嗌交部強烈譴責英國干預內政、嗌交部強烈譴責澳洲內政、嗌交部強烈譴責加拿大、台灣、日本、紐西蘭、德國、法國、瑞典、挪威、捷克干預內政...有冇發覺?家下日日新聞都係報呢啲?

Wait a minute,嗌交部你唔攰,我都攰啦;例如睇香港電台嘅國際新聞,一日到黑隨左睇嗌交部日嗌夜嗌,恐嚇呢個不會得逞,恐嚇果個自己用石頭砸自己嘅腳;鬧呢個係妓女,果個係千古罪人,中國必定會報復之類;一日到黑得個嗌字,有咩用?例如宣佈制裁美國嘅參議員 Ted Cruz?對方即時笑笑口回應:「哎呀,本來諗住今年去完伊朗嘅德克蘭,就帶埋家人來北京過暑假,好失望呀!」嗌交部又嚇到人哋笑到收唔到聲……

呢頭嗌交部日日大大聲嗌,果頭美國農業部揭發,中國再增購2萬2千噸大豆;而早前又踢爆中國買左137萬噸粟米、32萬噸小麥,究竟一路嗌交一路瘋狂買野,一定係想買晒美國嘅農產品,然後去餓死美國人!瘋狂買光美國農產品,嗌交部呢種傲嬌性格,真係好難理解啊!

更好笑嘅係,唔係好多人出來講話美國嘅制裁「冇用」,話對香港以及中國影響「輕微」,話中國「預期以內」,已經準備好「反擊」咩?原來反擊就係制裁美國官員唔可以去中國旅遊?原來反擊就係「爆買」美國農產品?你冇睇錯呀,7月16 號嗌交部「華大媽」華春瑩,聲稱「美方對中國實施無端瘋狂打壓,對中國實施霸凌,其所作所為不利於兩國建立互信」,睇到我眼都突──咩話?瘋狂打壓?Wah Big Mother, Up Mud Spring?

唔係話「一切都在中國掌握之中」、「沒有好下場」、「冇好結果」、「中國唔係嚇大」咩?而家終於認,原來中國成功爭取,被美國「瘋狂打壓」、「霸凌」拿?中國作為世界強國,又點會被人蝦?你又點可以容許中國被人蝦?乜中國仲係東亞病夫咩?唔係話美國係墮落而無可救藥咩?做咩突然食左誠實豆沙包,認自己被人蝦?你叫14億中國人,情何以堪呀?

「不利兩國建立互信」就更加令人笑到收唔到聲!先係美國與中國發生貿易戰,就係美國指中國不守信用,唔遵守世貿協議,拒絕開放市場;後係因為中共搞「港版國安法」,違反埋國際條約《中英聯合聲明》,因此美國佬就係話你信用破產,因此咩都唔想同你傾;最近美國佬好似食左火藥,日日都諗緊新招玩中國,由制裁官員,玩到吹緊要全面制裁九千萬中國共產黨黨員;由台海派飛機,南海派航母,到最近呢個星期,直頭宣佈完全否定中國九段線主張,一副戰鬥格要撐東盟腰,想同中國開拖咁款。

美國佬叫陣想開拖,你一係就還拖,一係就諗清楚想同人傾乜野,交換咩條件,嗌交部做乜呢?日日發表偉論鬧完人之後,就話人哋蝦你,然後話蝦你會影響「互信」?美國佬點覆你好?「信你老母,我就係一絲一毫都唔信你呀,你仲同我講互信?」;Sorry,應該文雅少少──「信汝娘,國而無信,其可以信之哉?」

更好笑係,中國嗌交部話人哋「干預中國內政」,例如禁呢個、驅逐果個,拒發簽證畀人,就話不評論個別例子,話係自己入境政策;但美、英、加、澳等國,話改變對香港嘅政策,包括畀咩人移民,或者唔批咩人簽證,又唔係人哋嘅內政?點解又變左中國內政?中國違約,例如《中英聯合聲明》嘅條約內容,就話係歷史文件;外國制裁,或者《中英聯合聲明》嘅備忘錄內容,就話係違反國際條約義務。公你贏,字我輸,中國嗌交部繼續日日用呢一套對人,然後期望人哋對你有咩反應呢?期望人哋同你「互信」,以及和好如初?嗌交部你認真?定係負責搞笑呢?

嗌交部強烈譴責!譴責!譴責!譴責!譴責!點解你地笑得咁大聲!

----------------------------

無懼白色恐怖 黎智英劉細良開講抗港版国安法

立即收看ChannelNEXT《人民學堂》

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!