• 【九五至尊重播】57歲江華超市掃疫情三寶 回應伍姑娘「前輩」惡行: 大家畀面掛住我啫
  • 2020-07-19    

 

有觀眾話演皇帝嚟講,江華數一數二。或者佢唔係演出嚟,睇佢行步路都大搖大擺好有架勢,堅係有皇帝格㗎!話時話,係咪好想再睇佢拍劇呢?Sorry,佢話:「呢個遊戲(娛樂圈)我唔玩好耐喇。」

大台最近第四次重播江華主演嘅《九五至尊》,令唔少平時話罷睇大台嘅網民都心郁郁,可想而知就算江華多年無拍劇,但佢嘅演技與魅力,早已植入民心!可惜,已經57歲嘅江華早已除低龍袍唔拍劇了,同李大蝦一樣做個星斗小市民,紓尊降貴去超市入貨。

雖則唔做演員咋,但江華依然好著重打扮㗎,話知你正值大熱天時,總之就係要時髦,所以長袖外套兼包埋頭巾,一個字,潮!

呢個潮人入到超市,同好多師奶諗法一樣,買乜都假,最重要係疫情三寶──米、廁紙以及清潔劑!好彩市民唔似之前咁瘋狂囤貨,超市亦貨量充足,江華可以慢慢揀。

唔講未必知,江華近年都幾熱衷玩微博,周不時都出新post分享下心路歷程。當然,玩得微博就少不免同好多其他香港藝人一樣,轉發下人民日報,表態支持下警察咁,同做醫護嘅大仔立場,南轅北轍。而武肺疫情爆發前,post得最多就係孖住老婆麥潔文四圍登台唱歌啲片。

疫情爆發,無得登台唱歌仔啦,唯有做住家男為屋企入貨,而且入勁多水果,香蕉、奇異果乜都買啲,唔通呢個就係佢保持身體狀態嘅方法?

唔只身體狀態,連心態都ok。事關早前伍詠薇喺節目大爆一位「前輩」惡行,例如遲到、no show、失蹤、話之啲後輩死等等,啲提示好易令外界聯想到江華。

對此,佢亦大方同《壹》仔講:「呢個遊戲我唔玩好耐喇。其實我覺得大家敏感咗啲,(伍詠薇)係咪講我都唔知。不過,大家畀面,成日都掛住我,先會諗起我啫。我都講過,最重要係呢個遊戲我唔玩好耐喇,大家繼續開心就得啦。」

----------------------------

無懼白色恐怖 黎智英劉細良開講抗港版国安法

立即收看ChannelNEXT《人民學堂》

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!