• 威利尋寶記|刁佬
  • 2020-07-17    

 

最近金魚缸其中一個熱門話題,除咗的士執散紙之外,點少得維他奶後人羅琪茵入場掃走思捷(330)董事局?羅琪茵老公莊友堅堪稱刁神,今次呢單刁無莊友堅身影刁佬打死都唔信,作為刁佬,當然要分析一下呢單刁。

羅琪茵原本持有4.98%思捷股權,低於5%披露水平,但卻可一下子無聲無息升到12%,取代原大股東邢李㷧,你話無基金支持,又點可能有咁多貨?相反思捷嘅反應就似蒙在鼓裡,面對傳媒提問及被提出罷免董事,只輕輕地說有可能對公司重組構成障礙。

好多人覺得思捷無前途,唔知莊友堅兩公婆入主有何意圖。自2008年思捷江河日下後,仍然無人駕駛超過十載,年年輸錢,個個鬼佬高薪厚職,連前排辭職的財務總裁及執董鄧永鏞,即係鄧肇堅個孫,每年人工達到516萬,蝕錢都仲可以養咁多高薪厚祿嘅高層,好容易估到呢間公司一定係坐擁好多現金。

打開思捷2019年中期報告,果然真係坐擁金山銀山,有成27億港元現金,羅琪茵未宣佈成為大股東前,思捷市值只係16億元左右,市值仲低過現金,唔洗識股票都知道好抵,仲未計公司持有的資產呢。單看這點,淨係入主思捷,騎劫董事局之後派哂公司啲現金畀自己,呢單刁已有數圍。

之後請裕華國貨級數嘅高手出掌管理返公司,不單止平過班鬼佬。話唔定幫阿爺執正返間公司,轉手賣畀阿爺立個大功。

再睇返思捷既收入,半年度業績已有57億港元,思捷做開迅銷時裝,有咩好得過用一間咁大Turnover嘅公司做洗衣機?思捷年年輸錢,再輸多啲都實有人信,做時裝喎,思捷喎,衰開有條路,輸錢幾咁合理。世上有幾多部洗衣機可以一洗洗咁多?相信無乜。

自威利系改名後,股壇上再無威利系,喜歡賽馬既莊友堅將威利系搬到馬場上,現在重出缸湖,必定經過精密計算,該出手時就出手。

專欄作家簡介:

刁佬

遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。

----------------------------

無懼白色恐怖 黎智英劉細良開講抗港版国安法

立即收看ChannelNEXT《人民學堂》

----------------------------

全新「和你撐計劃」 專享獨家禮遇 實際行動支持《壹週刊》 按此了解更多

壹呼百應 號召有心人 請香港人睇壹週刊 按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!