• 【中環人語】揭撐警藝人曹永廉富貴祖宗 老豆做小販變窮親戚
  • 2020-07-15    

 

撐警藝人曹永廉日前振振有詞向黨媒表示:「我阿爺、我阿爸,我任何的祖宗都係中國人。」曹永廉攞祖宗出來「曬」自有玄機,唔好以為曹永廉係藝員仔一名,揭開佢曹氏祖宗,確實又幾把炮㗎!

只不過曹永廉老豆─曹紹荃早年生意失敗,以至要貼地做小販,甚至做看更以養活曹永廉四兄弟,雖說職業無分貴賤,對比起其顯赫嘅祖父輩嘅親戚,難免變成「窮親戚」。事故曹永廉甚少提及其家族成員嘅顯赫故事。

其中最巴閉要數不同房所出嘅伯父曹紹松,佢五十年代已白手興家,是香港地產發展商,旗下嘅安華建築喺港九新界發展住宅,包括何文田嘅「明德園」,李小龍同埋已故商台主持人林彬都係住客,曹紹松亦持有安華證券及擔任金銀業貿易場理事,佢更加係社會賢達,東華總理、MBE太平紳士,荷蘭水蓋多籮籮。只不過曹永廉呢位「富親戚」對香港前途未許樂觀,1984年在《中英聯合聲明》簽署當年,就移民咗去加拿大溫哥華,且一去無回頭,1987年更將香港嘅上市公司偉華企業賣盤,至2011年長眠喺加拿大。

曹永廉早前接受「人民網香港」專訪,表態撐港版國安法。(人民網截圖)
曹永廉的伯父曹紹松(右一)

再數曹永廉太爺嗰輩,有位曹受培仲巴閉,佢係清末時期當官,1918年走去屯門興建一座「曹園」,即現時屯門新墟仁愛堂一帶,退休後在屯門經營鹽田,1951年其後人將「曹園」賣俾「新界教父」陳日新,改名為「鹿苑」作為花園酒樓及遊樂場。既然曹永廉祖宗同屯門如此有淵源,何不夾埋在屯門出身嘅何君堯,齊齊撐警呢?
鹿苑(《新界風光》小冊子)


----------------------------

全新「和你撐計劃」 專享獨家禮遇 實際行動支持《壹週刊》

按此了解更多

----------------------------

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!