• 【禁忌之林】彭定康鬧嘅賣港賊──林鄭月娥|林忌
  • 2020-07-10    

 

林鄭月娥雖然考試唔係真係成日考第一,但係作為賣港集團嘅第一位,就「肯肯定」係考第一,甚至連一向講野溫文有禮,永遠保持紳士作風嘅前港督彭定康,都要忍唔住爆Seed,在接受美國CNBC訪問時,直指林鄭係Lamentable Quisling Figure,亦即可悲嘅賣港賊!

Quisling呢個字,真係可圈可點,原因呢個字就係出自二戰時,挪威被納粹德國佔領後嘅賣國賊Vidkun Quisling;呢位 Quisling 嘅人兄,在成為了納粹德國嘅挪威總督之後,全力協助納粹德國迫害挪威人,以及運猶太人去滅絕,因此成為了歐洲多國語言中,作為出賣自己同胞叛徒嘅同義詞。

以林鄭為首嘅一群賣港賊,已經去到連最基本嘅掩飾都唔再需要,連以往都衰衰地去作野堆砌藉口,已經去到連戲都廢時做。只不過一年前,大家記唔記得,呢位林鄭月娥大大聲,話唔搞「送中」,香港就變「逃犯天堂」,口口聲聲為左陳同佳案嘅死者潘曉穎伸冤,話好可憐佢父母,真係諗起都心酸呀!

今日呢?中共通過「港版國安法」之後,先係加拿大暫停與香港嘅引渡,再係澳洲暫停埋,然後紐西蘭話研究緊,美國話會停,英國就立緊法,全部都要停止與香港嘅逃犯引渡協議!咁而家即係點?係咪應該歌頌一下林鄭月娥,令香港成為名符其實嘅逃犯天堂?而家逃犯四圍都係,全球都引渡唔到啦,係咪令大家好擔心呀?定係哦,原來又冇所謂呀?定係話要去「懲罰加拿大」或者「制裁澳洲」呀?

林鄭上任時大大聲:「如果香港人嘅主流意見,令我無辦法再擔任特首,我會辭職」,家下承諾就等如「五十年不變」,或者「一國兩制、高度自治」一樣,全部成為了「歷史文件」,掉晒落垃圾筒。搞到香港失去特殊地位,港人留學嘅美英加澳要接收「香港難民」,美國互聯網龍頭,集體杯葛向香港提供用戶資料,成功爭取港人寧可移民,說好嘅辭職呢?

呢兩個月見到嘅,就係一班所謂香港「精英」集體淪喪,面對強權嘅壓迫,唔敢反抗唔敢劈炮,仲要不知廉恥地,瘋狂講大話,當全地球人係傻;限聚令亂簽名,就吹成三百萬民意;民意咁支持你個港版國安法,咁驚咩人走?做咩外國收香港人,中共外交部要老羞成怒?范徐麗泰三年前仲大大聲,話「如果不相信一國兩制,最好嘅方法係離開香港」,家下香港人想離開,外國又接收香港人啦,中共港共發咩爛渣呢?

三十五年前,林鄭幫英國推廣BNO,證明係當時一種新嘅英國國籍;三十五年後,林鄭話「英國單方面改變BNO情況,相信國家(中國)會處理」──處理乜野?唔畀人走?林兆波個居英權點來?林兆波就走得,我哋就唔走得?成班中國小粉紅,唔係成日大大聲話「人走地留」咩?話唔需要香港人,家下做咩要留低香港人呢?畀你換晒做中國人,趕走晒其他人,唔係中國最開心咩?

唔止政治衰到貼地,連武漢肺炎都搞到第三波來襲。政府堅拒封關,大量豁免中國人入境免檢疫,七個月都仍未能大量檢測病毒,然後防疫工作就純玩政治,令人發笑嘅室內不限人數,戶外限50人;林鄭月娥終於成功爭取,武漢肺炎再度在香港大爆發!呢種人,絕對係香港歷史上嘅千古罪人!


----------------------------

全新「和你撐計劃」 專享獨家禮遇 實際行動支持《壹週刊》

按此了解更多

----------------------------

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!