• 【禁忌之林】BNO居英法律常識|林忌
  • 2020-07-03    

 

中共強推「港版國安法」後,英國政府因應中共政府違背《中英聯合聲明》,宣佈為BNO提供居留與移民的新方案,以助港人移民英國,由最初傳出的「一年簽證,多次續簽」的路徑,到最新外相所透露,即一次過批五年簽證,即5+1永久居留、加完整「英國公民護照」(BC) 方案;這些年期與逗留條件,雖然暫時仍未有細節公佈,但觀乎其年期,應與英國其他類型的移民相同。

然而早前內政大臣公開嘅文件,卻係指BNO可以先抵英,限你不可動用公帑,卻免除收入審查;根據目前嘅英國法律,即使在英國土生土長,要把沒有英國公民身份的偶配或18歲以下的子女,申請到英國居住,申請人必須證明自己家庭,每年能擁有最少£18,600 的收入,而非英國公民嘅子女,首位要加£3,800,之後每個要加£2,400 年收入,才可以移居英國;而如果沒有符合資格嘅收入,就需要用資產與存款,即證明家庭能夠足以自給自足,不會動用公帑;然後才可以如上述5+1,即永居加成為BC;因此BNO個方案如果唔需要審查,連BNO家屬都可以一齊免審查移居,就係連英國本地人都冇嘅待遇。



坊間常犯的錯誤,即把居住5+1年後,把領取BC,稱為「入籍」;對BNO申請人來講,呢個講法係完全錯誤嘅;BNO本身就係「英國國籍」,但擁有進入英國六個月嘅權利,卻唔擁有工作、讀書、長住權利;如果根據英國政府嘅新方案,BNO持有人一入境,即可以工作讀書,然後再申請五年簽證,加上本身只要合法居住,即享有本身英國國民嘅投票權(只要有合法居住註冊地址即有),除左唔好可拎「綜援」式嘅福利救濟,以至 BNO 免簽證國家少過BC 之外,以至如果在英國犯法,會影響將來居留權之外,其實係冇分別,基本上可以當係「未永久居民」嘅資格。



至於醫療費用,以至教育費用最終的安排,就要視乎英國政府最後決定的方案;據知部份議員正積極游說,為BNO爭取更多福利;留意即使是BC以至英國本地人,如果在大學開學日之前連續三年,並不是「通常居於英國」(與香港相關法例要求類似),也需要繳付「非本地生」嘅費用;因此相信BNO人士呢方面都會面對相同嘅要求。



因此即使唔換BC,只要住足五年(每十二個月離開不足180日)後取得永居後(Indefinite Leave to Remain,ILR),其實已經擁有完整公民權,包括可以領取福利,只係未有 BC 護照(但你有實質分別不大嘅BNO);而要取 BC 除了要住多一年,就係限制你居留英國期間,五年內不得離開英國超過450日,即除返約每年90日,特別係最後一年,必須不得離開英國超過90日。



比較返香港,有班左膠與社區組織協會之流,成日老吹「家庭團聚是人權」,話移民來香港,就應該立即可以申領救濟金等人養,呢種係完全錯誤嘅觀點。真相係除咗單程證之外,任何人與「外人」結婚,包括如台灣人或美國人,要來香港家庭團聚,都一樣要資產入息審查,甚至要有合適居所審查──即係短租合約或劏房,都已經唔合格。而要得到「香港永久居民身份」,比起移民英國更耐,要達7年之久;而且簽證常以 2-2-3形式發出,即係兩年續期,一旦離婚、失業、租唔起屋,就會被入境處拒絕續簽,然後到期要返回原居地。



因此BNO如果可以一如早前外相公佈,簽證一簽五年,只要你有辦法合法生存,或靠香港賣樓,或食儲蓄嘅老本,甚至靠親友嘅救濟,以香港人嘅生命力,要在英國生存,其實唔難;對白領、中年、專業人士來講,人工或者會少一大截,或者搵工會相對困難,或放唔低昔日嘅地位。



但對剛畢業、廿幾歲嘅後生仔來講,英國藍領工作,例如做侍應都有三萬港紙月薪,比起香港白領文員而言,不但人工高,福利好,工時短,而且住宿環境比起香港劏房,更係天與地嘅分別;未來英國脫歐後,來自東歐的低技術工種離開,或不再有補充,因此在大倫敦地區,理應唔愁冇工返。


----------------------------

全新「和你撐計劃」 專享獨家禮遇 實際行動支持《壹週刊》

按此了解更多

----------------------------

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!