• 【2020港姐大熱】「嫩版廖碧兒」早被林作mark實 政協千金蔡頌思降呢參選
  • 2020-07-05    

 

嫩版廖碧兒,林作一早follow

TVB《2020香港小姐競選》破天荒搞網上面試,結果「照騙」情況接二連三,質素嚇死人。

不過,見得人的熱門總是有的,例如洗米華兒子周柏豪、林作都一早mark實follow,兼有「嫩版廖碧兒」之稱的Maisie鄺美璇。嗱,連阿王郭富城都曾經關注過佢……家姐,照計都唔差得去邊啦!

Maisie鄺美璇一早已經有選港姐經驗,事關佢家姐Maggie鄺美淇係2016年港姐大熱,當時包包面幾好肉地的鄺美璇已經抆住衫尾,陪伴家姐出席面試。四年過去,鄺美璇甩咗baby fat,下巴尖晒,成個人成熟咗又有女人味。

選港姐除咗講樣,大家都知,智慧甚至背景可能更重要。鄺美璇畢業於著名學府倫敦政治經濟學院(縮寫:LSE),畢業後喺投資銀行工作,同時亦係一位獲認證的人生教練,過關。何況,佢家姐Maggie當年選港姐時曾透露提名人係藝人兼選美評判,換言之有人脈,阿妹鄺美璇自然會繼承呢個後台,不過Maggie話今次係自己提名阿妹。再望望一樣喺投資銀行工作的家姐Maggie的社交網站,不乏港姐朋友,除2016年同屆參選的馮盈盈、劉穎鏇,還有麥明詩、何艷娟等,相信都能幫細妹一把。

如果唔好彩步家姐後塵落選亦未必係損失,學家姐咁,藉「選港姐」增加知名度,加上本身高學歷靚女,港姐?跳板嚟啫,真係信「逆市筍工」咩!大台幾錢人工google吓就得啦。

+5

蔡繼有之孫、全國政協常委之女

當然,一定有靚女唔在乎「筍工」,單純醉心演藝事業,甚或只求挑戰自己先至參選嘅,呢個人叫做Jocelyn蔡頌思,芳齡26歲。佢就把炮喇,阿爺係已故「海產大王」蔡繼有,老竇係全國政協常委、香港中華總商會會長,以及香港新華集團主席蔡冠深,難怪人稱「40億千金」!

蔡頌思貴為千金,屋企仲要得佢一粒女(其他是兄弟),自然係掌上明珠,父母更唔捨得放佢出國讀書,要佢留喺香港、留喺父母身邊,可想而知溫室小花。之但係,蔡頌思想睇下溫室外的世界,於是大學時,佢瞞著家人嘗試貼地生活:服裝店兼職收銀、喺旺角坐紅Van、行葵廣、食大排檔。畢業後佢試過喺老竇公司工作,但返工無人敢叫佢做嘢,一直坐到收工。於是,毅然追夢,由一日四百元幫人拍片做起,繼而幕後變幕前,2019年套賀歲片《家和萬事驚》,佢就拍住吳鎮宇、古天樂、袁詠儀、張達明等人一齊名列主演。

以佢條件,入圍應該坐定粒六,除非評審介意佢身高1米57,以及26歲「掹車邊」,就快達到參選年齡27歲上限囉。

+5


----------------------------

全新「和你撐計劃」 專享獨家禮遇 實際行動支持《壹週刊》

按此了解更多

----------------------------

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!