• 【疫市賣酒求出路】直擊樂瞳做送貨妹招徠 冧爆客仔:好似網上Dating咁緊張
  • 2020-07-01    

 

公開卡片親自覆客

曾是大台配角,出過噴血寫真,被高登仔封為女神的樂瞳,最近搖身一變做老闆,在疫市創業賣洋酒,好夠膽量。將積蓄押上這舖創業作,樂瞳瞓身去到盡,將卡片掟上網,講明親自接單覆客作招徠。

本刊試打她公開的卡片電話,測試是否樂瞳回覆,雖然只限whatsapp留言落單,並拒絕用錄音回覆,但事後本刊問番樂瞳訂單內容,她即能講出對話細節,確實親自覆客無欺場,而且好有耐性向客人推介每樣貨品,顧客之道達標。

幾年前對洋酒有興趣的她,走到意大利酒莊一趟,之後又通過品酒師試,準備考牌,早為洋酒生意舖路。
疫市創業,瞓身做的樂瞳,掟將卡片上網,講明親自覆客,即引來好多男粉絲落order。
樂瞳卡片電話,只限whatsapp留言訂貨。本刊以客人身份留言,再事後問返樂瞳,她即能講出對話內容,果然親自回覆客人。

做埋送貨妹吸客

開業第二週,她還親自送貨,呢條橋簡直吸引一班醉翁之意不在酒的忠粉,而且清一色男班,買酒見偶像,好過畀折扣優惠。創業樂瞳靠食腦疫市突圍。

送貨當日,本刊跟隨直擊。自言小本經營,她暫租朋友葵涌工廈的寫字樓做貨倉,地方不便入鏡,唯有在工廈樓下等她出發送貨。慳得就慳,更找來前新城DJ林柏希(William)仗義幫忙做司機。
幫手搬貨,純綷體驗吓!有壯男同事又有拍檔,呢啲粗重工夫,幾時輪到佢做。不過小本經營,樂瞳話由拍片推介、設計包裝、試酒、入貨等,都係佢一腳踢。
由拍劇到出性感寫真,儲落唔少男粉絲,故她一搞洋酒生意,班粉絲即力撐幫襯。

酒翁之意見女神

拉著有兩箱酒的手推車,樂瞳說:「好開心,好緊張。唔知佢哋見我有咩反應,可能好冷淡,哈哈!」

她再一次力證親自覆客:「成日有客人喺whatsapp問我係咪樂瞳,講咗好多次,真係我。好似今日咁遲咗少少到,係因為今早我接到張新單,客人來自馬來西亞,我一路覆客,一路化妝,所以搞到遲咗出門。」

第一站送貨到土瓜灣,車上她致電客人,通知約在 15分鐘後到達。送貨行動,雖只是開業宣傳攻勢,但她亦認真對待。

不過原來是「路痴」的她,下車後完全失方向:「究竟點行,唔識路!」,最後由義務司機林柏希帶路。「好似去嗰啲網上dating,約網友見面嘅感覺,好緊張呀!」話口未完,樂瞳遠處已見忠粉男客,站在寓所樓下等候女神送貨,她急步趨前:「Hello,多謝你呀,非常多謝你呀!」做生意,粉絲變成米飯班主,幫襯她一支白酒已經要鞠躬致謝。
親自覆客未夠,還做埋送貨,對於醉翁之意不在買酒的男粉而言,幫襯一支酒就可以由偶像送貨見面兼合照,抵啦!

有鮮肉市場

暖男粉絲出錢支持,仲化身「送水輝」,一手接貨,一手向她遞準備好的冰凍飲料:「飲啖水先!」,天時暑熱,行兩步已爆汗樂瞳十級感動:「竟然為我預備支水,好sweet好窩心一件事,喺呢刻係咪要飲一啖!」隨即開封,「呢啖水真係特別甜,俾心心。」跟手向男粉說:「試咗支酒,啱飲的話記得再幫襯。」相信醉翁之意不在買酒的男粉絲而言,能與女神見面兼合照留念冧死,幾百元的幫襯支持,濕碎啦!

當日連跑六站,由土瓜灣的「送水輝」,到新蒲崗另一男粉Sunny,都是鮮肉客仔,樂瞳不希奇,還反問:「你地覺得我吸引嘅粉絲對象,年齡會比較大嘅咩?」33歲,勿低估她,仍有鮮肉市場的潛力。
樂瞳出寫真,童顏加誘人身材,是網友心目中女神。
樂瞳話依家跟圈中朋友相聚,都會派卡片,把握每一個生意機會。

試酒、包裝一腳踢

咪睇樂瞳嬌嫡嫡,其實幾捱得,當年拍大台劇,要吞幾籠存放超過一星期的過期道具饅頭,都可以頂硬上。現在創業,小本經營要一腳踢,辛苦程度不比捱更抵夜的幕前工作少。

「雖然有拍檔及幾個同事,但我自己管好多範疇,公司ig同facebook,定期拍片介紹啲酒,甚至前期工作,如設計logo同包裝、用咩包裝紙、試酒、入貨、定價,所有嘢都係自己落手落腳。開業頭個星期,好多朋友支持,但自從我將自己卡片放上網,就有大量不同國藉嘅粉絲主動購買,都算係一個好開始。」
樂瞳:「雖然同拍戲唔同,做生意日忙夜忙,覆客覆到凌晨時分,但過程我卻好享受。」

拒酒客閒聊

疫市創業,求出路,也是一種冒險。

「都會擔心生意額,例如成日諗辦法,點樣可以擴闊客源,或者代理更多產品,姑勿論生意最後係咪成功,但見到咁多人留意我,繼續支持我,已經係一個好大嘅鼓勵。」

親自覆客,未遇過古怪要求,但會謝絕訂酒以外的閒聊!「有啲人會問好多唔關事嘅問題,例如話好鍾意睇你演戲,或說支持咗我好耐,問我會唔會再拍戲?我會話唔好意思,呢個真係工作上嘅電話,如果需要買酒嘅話,先至搵我啦。」

曾跟徐子珊互片

33歲仍是童顏的樂瞳,原名龔茜彤,model出身,07年入大台由閒角做起,直至11年憑劇集《點解阿Sir係阿Sir》演反叛學生,網民勁buy,更封她為高登女神。

愛唱歌的她, 曾圓夢出唱片,09年以樂壇新人,跟徐子珊在頒獎禮拗手瓜,在商台的「叱咤樂壇頒獎禮」角逐生力軍,她得銅獎,徐子珊則是銀獎。
11年她在劇集《點解阿Sir係阿Sir》演反叛學生,網民勁buy,一臉童顏的她被為高登女神。
09年樂瞳曾經出過唱片,更跟同年做樂壇新人的徐子珊拗手瓜,在商台頒獎禮,她在新力軍獎得銅獎,徐子珊獲銀,金獎得主是余翠芝。

食過期道具饅頭萌去意

由閒角做到女配, 17年因在大台劇《平安谷》遇上不人道對待,令她決心不再續約。離巢後曾在訪問中說:「一場戲要我吞六、七個饅頭,但嗰啲係存放咗超過一星期嘅道具饅頭,又唔知點解要攞嚟再拍攝用,可能有人揸過咬過,為拍攝我都攞起嚟食,一嗌cut我即刻吐返出來。」

離大台後,自由身的樂瞳在其他電視台主持節目,現在幕前生意兩兼,辛苦但享受:「雖然同拍戲唔同,做生意日忙夜忙,覆客覆到凌晨時分,但過程我卻好享受。」
17年因拍大台劇《平安谷》遇上不人道對待,硬食過期至少一星期的道具饅頭,加上角色無發揮,種種際遇令她萌去意,不跟大台續約。


----------------------------

全新「和你撐計劃」 專享獨家禮遇 實際行動支持《壹週刊》

按此了解更多

----------------------------

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!