• 聯交用重典殺錯良民|刁佬
  • 2020-06-26    

 

早排疫情條街一潭死水,細價股市場亦是如此,之不過細價股寒冬由2018年開始,要死的都死得七七八八,再踩多腳感覺都唔深。近年聯交所積極DQ細價股,聯交所作為香港上市公司的前線監管機構,維持一個公平有序兼高效率的市場,的確無可厚非。「治亂世」雖然要用「重典」,但當「重典」嚴苛到盡頭,又係咪真正保障投資者?會唔會逼到想從良的企業永不超生?

聯交所每個月都會刊發《有關長時間停牌公司之每月報告》,現時主板及創業板加埋總共有73間公司長期停牌,當中不少知名案例,例如中國高精密(591)當年因為一句「國家機密」,不願公開資料,由2012年停牌至今。又例如曾經廣告賣到成行成市嘅滙源果汁(1886),因為管理層出現誠信操守,2018年停牌至今。刁佬仲見到天然乳品(462)原來由2010開始停牌至今,足足十年,不禁諗起柴九嗰句「人生有幾多個十年」。呢啲公司一係早死早投胎,一係早點解決問題,慳返筆專業費用,放生被停牌夾住無得賣的小股東。

近年散戶多咗了解金融市場,媒體上都多咗人講《上市規則》相關知識,好多人都知聯交所最喜歡用《上市規則》第13.24條去DQ殼股。因為條例寫明,上市公司須有足夠的業務運作,或擁有相當價值的有形資產或無形資產,先可以持續上市。殼股講明就是殼,虛有其表,最重要嘅資產就係上市地位,業務都係用嚟養住隻殼。刁佬一向睇唔起做賊,都做得唔認真的賊,虛有其表的殼主真係死不足惜。

不過都不排除殺錯良民,總有人買殼是希望大展鴻圖。做開老闆都知經營的苦不堪言,好多時變化總比計劃快,你估好多人可以好似劉嗚煒咁,話海洋公園有無限可能,就可以向政府伸手攞錢咩!DBA電訊(3335)由2013年開始停牌,聯交所開出嘅復牌條件,要求公司注入業務,重新當新上市申請,豈料2018年保薦人辭咗職,預期在今個月重新委任。要求一間正陷入財政困難的上市公司當新上市申請,是不是有點太過嚴苛?

最近有團體發起「聯交所濫權關注組」,積極轉發多宗被聯交所除牌的報道,包括本地服裝Muse母公司業務因為「過度集中示威區」而被拒絕上市,三愛健康(1889)及永保林業(723)將被港交所除牌的報道。「聯交所濫權關注組」甚至會寫打油詩同登大字報去各媒體。

正所謂「苛政猛於虎」,一檔符合上市要求的生意唔易搞,符合財務表現之餘,又要令班未做過生意的聯交所大帝盤問你一大輪,今時今日做生意都唔易,搞個上市,同維持上市地位都要咁嚴格,呢劑整治市場秩序的藥,會唔會開得過猛呢?

專欄作家簡介:

刁佬

遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。


----------------------------

全新「和你撐計劃」 專享獨家禮遇 實際行動支持《壹週刊》

按此了解更多

----------------------------

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!