• 【禁忌之林】左膠上腦嘅政治正確(林忌)
  • 2020-06-26    

 

近日因為BLM(Black Lives Matter)嘅黑人反種族歧視運動,原本由追求正義嘅運動, 多得一堆左膠全面膠化其運動,將好好徹查警暴, 以至解決制度內結構性歧視有色人種嘅問題, 變成好似中共文化大革命咁,四圍追求所謂嘅政治正確, 否定歷史與過去,為了所謂今日嘅「政治正確」,不斷審查名稱、 產品、以至歷史銅像與建築物。 



以為亂世佳人落畫、邱吉爾像被塗鴉已經夠荒謬,最新嘅要求, 竟然係要清算美國「總統山」四大總統嘅石頭像, 以至要求耶魯大學改名;著名牌子嘅「美白產品」被下架停售, 甚至有澳洲嘅國際象棋冠軍,指被電台訪問要求回應, 是否白棋行先,係歧視黑人;呢堆荒謬到不得了嘅「理由」, 不但無法減少種族歧視,反而膠化「反歧視」, 令原本最合理嘅要求,變成神憎鬼厭。



晒太陽會令膚色變黑,在室內過多會令膚色變淡,咁返Office 工係咪歧視?去海灘晒太陽,晒出一身美麗嘅古銅色肌膚, 又或者用太陽燈健美,令自己皮膚變黑,咁又係咪歧視? 太陽燈係咪應該要停售?海灘係咪要封左佢?點解美白就唔得,「 美黑」就得?第時選擇配偶,係咪要先審查下有冇歧視? 例如你鍾意白皮膚就唔得,要鍾意黑皮膚先得? 又或者第一個女朋友係白底,下一個要黑底?究竟呢種所作所為, 對於解決「歧視」有咩幫助?定係令一切都變成不合情理嘅要求, 令歧視更加嚴重?



比起幾十年前,如今任何民主國家都立了法, 禁止或最少限制種族歧視;但係種族歧視仍然存在,點解? 唔係因為幾百年前有人支持奴隸制, 亦唔係睇左某電影個皇帝身邊有幾多個宮奴,而係社會制度唔健全, 令窮人一世貧窮,令窮人永遠輸在起跑線。要改變歧視嘅現象, 個關鍵就係令到任何膚色人士,能夠得到公平競爭嘅機會, 而唔係改名,或停美白產品,或者推倒歷史名人嘅銅像。



當然叫法與稱號,都可能會真正助長歧視,例如點樣稱呼有色人種, 或者是否視有色人種為國民一份子,呢類就應該改。簡單如在香港, 印巴裔香港人,都成日被亂寫成印巴「藉」(隨時人哋拎英國護照, 係英籍),甚至寫成南亞人,彷彿佢哋唔係香港人一份子, 呢類最歧視嘅問題,反而冇香港左膠去日日跟進;但係反過來, 遠在天邊美國嘅事,成班左膠就當正自己係美國人, 日日鬧人哋歧視,都睇唔到佢哋自命嘅中國, 或者在香港對非中國籍人士,究竟有幾咁歧視!



茶餐廳冇英文?冇問題;餐牌只寫殘體字?冇問題;但係黃店唔講「 普通話」?就梗係要搵隊去鬧歧視啦;呢種為鬥而鬥, 甚至係為自己種族(中國人),去批鬥別嘅種族; 或者乜都拉成種族歧視,去包庇埋個獨裁專政政權(中國病毒) 嘅做法,話「獨立調查」武漢肺炎就係「歧視」, 正係完全扭曲晒是非黑白(你睇漢字幾歧視?由話你黑仔, 到話是非黑白分明,都完全歧視黑色,究竟反歧視係應該改善制度, 定係專玩文字獄?除非左膠左癌上腦之外,其實真係咁難明咩?


----------------------------

全新「和你撐計劃」 專享獨家禮遇 實際行動支持《壹週刊》

按此了解更多

----------------------------

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!