• 【Hello Kitty藏屍案】逼女公關食屎 虐殺後再肢解 法官斥極度喪心病狂|壹經典
  • 2020-06-24    

 

香港十大奇案之一 Hello Kitty 藏屍案由 1999 年發生至今已超過 20 年,當年揭出案情時轟動全香港,殘忍手法及場面簡直令人不忍直視。案件發生後一年,三個被告被陪審團裁定謀殺罪名不成立,但誤殺及其餘兩控罪成立。當時負責審理的法官阮雲道判處三人終身監禁,是誤殺罪中最嚴厲的判刑。

法官阮雲道於上周(16日)於薄扶林碧瑤灣寓所昏迷,被送瑪麗醫院證實不治,並於下周二(30日)舉行安息禮。阮官辭世,不敢令人再次憶起這宗駭人的 Hello Kitty 藏屍案件,尤其當時他在庭上花足半小時怒轟 3 名被告,形容被告極度喪心病狂、殘忍、冷酷無情、墮落、暴力及惡毒,並非人類對待人類所能做出的行為。而《壹週刊》早年亦曾把這宗被視為香港史上最兇殘、最慘無人道的肢解案重組:

Hello Kitty藏屍案|逼女公關食屎

「我冇咗個頭,畀返個頭我呀!」

阿芳呢個夢已經發咗成個月,「我真係好驚,真係頂唔順,將呢個秘密講咗畀社工知。」

喺99年3月中,我男朋友阿倫帶咗我上加連威老道嘅一幢唐樓,入到屋,已經見到阿樂同阿祖喺度,仲有一個女人俾人用鎖鏈鎖住。

阿倫、阿樂同阿祖,成日係咁打個女人,阿倫仲叫我打埋一份,除咗拳打腳踢之外,仲試過搵油同辣油滴落佢傷口度,又試過要佢食返自己啲屎。

到咗4月左右,有人見個女人喺廁所「典下典下」咁,冇幾耐佢就冇晒反應。

之後嗰日,阿倫叫咗我返去幫手,我見佢哋喺廚房,好似煮緊嘢。

之後,阿倫仲將個頭縫咗喺個Hello Kitty入面。

肢解女公關 將頭骨縫入公仔

Hello Kitty 藏屍案當中,首被告阿樂,一直表現相當冷靜。「其實我都係想佢還錢,冇錢還咪郁佢囉,點知佢咁唔踢得,踢踢下就死咗。因為頭骨太大太難攪,於是,我就叫阿倫將個頭骨縫入個公仔入面。至於其他部份,都係逐少逐少鋸出黎,拎去煮咗佢,將屍體分咗5至6袋。」

至於另一位被告阿祖,就越黎越驚。「當時我已經崩潰,阿樂攪條屍嗰時,好似若無其事咁,真係好心寒。其實我有叫過佢唔好再攪條屍,但係……阿樂反而話……『你地玩就得,我玩就唔得呀?』」

踢死人、肢解、烹屍,阿樂、阿祖同阿倫,以大比數裁定謀殺罪名不成立,誤殺罪名成立,被判終身監禁。

法官形容,三名被告極度喪心病狂、殘忍、冷酷無情、墜落、暴力同惡毒,並非人類對待人類所能做出嘅行為。

雖然佢地3個都提出上訴,最終,阿祖因為喺死者死前一日並無喺現場,加上親身自首,2004年改判入獄18年。

凶宅唐樓多怪事

Hello Kitty藏屍案中,涉事嘅單位位於加連威老道嘅800幾呎唐樓單位,曾經用嚟殺人、肢解同分屍,即使警方已經破案,三位被告繩之於法,傳聞仍然有唔少怪事發生。

大廈有4層高,1樓同2樓都係髮型屋,有職員就話,曾經喺店內見到Hello Kitty公仔出現。事發單位喺4樓,喺正對面單位示本都住咗一家人,最終都因為怪事連連,好快就搬走咗。

全幢樓最終只係得返一戶住客,案發單位亦都有傳,有裝修師父喺上面開工,工程攪到一半就已經走晒。事發之後,怪事接二連三,連到唐樓拆卸,呢啲怪事已經成為城市傳聞。
+14


----------------------------

全新「和你撐計劃」 專享獨家禮遇 實際行動支持《壹週刊》

按此了解更多

----------------------------

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!